Qazaqstanda bir jylda 45 myń bet dárilik nusqaýlyqtar aýdaryldy
NUR-SULTAN. QazAqparat – Qazaqstanda bir jylda 45 myń bet dárilik nusqaýlyqtar aýdaryldy, dep habarlaıdy QazAqparat Dárilik zattar men medıtsınalyq buıymdardy saraptaý ulttyq ortalyǵynyń (DZSUO) baspasóz qyzmetine silteme jasap.
Baspasóz qyzmeti taratqan málimtterge qaraǵanda, Dárilik zattar men medıtsınalyq buıymdardy saraptaý ulttyq ortalyǵy qazaqstandyq naryqqa kelip túsetin dáriler men medıtsınalyq buıymdardy medıtsınalyq qoldaný jónindegi nusqaýlyqtardy memlekettik tilge aýdarý jáne zańnamamen reglamenttelgen nusqaýlyqtar, qaptama maketteri, zattańbalar, stıkerler, jarnamalyq materıaldar aýdarmalarynyń sáıkestiligin tekserý qyzmetterin saraptama sheńberinde oryndaıtyn elimizdegi birden bir uıym.
Ótken jyly Ulttyq ortalyqta 100 myńnan astam paraq memlekettik tilge aýdarylǵan jáne sáıkestik turǵysynan tekserilgen, bul aldyńǵy jylmen salystyrǵanda 23% kóp. Onyń 45 myńnan astamy – nusqaýlyqtar aýdarmasy. Qazaqstanda árbir dárilik zattyń qazaq jáne orys tilderinde tolyq sıpattamasy bolýy kerek ekeni belgili, óıtkeni ol patsıentti preparat týraly: quramy, shyǵarylý túri, qoldanylýy, qarsy kórsetilimderi, dozalaý rejımi, basqa dárilermen ózara árekettesýi jáne t.b. jóninde qajetti aqparatpen tanystyratyn mańyzdy qujat.
«Dárilik nusqaýlyq patsıent úshin durys qabyldanǵan preparattyń emdik áseriniń bolýy jáne onyń densaýlyǵy men ómirine tónetin qolaısyz zardaptardan saqtandyrýynyń kepili bolyp tabylady. Sondyqtan nusqaýlyq mátini tek medıtsınalyq qyzmetkerge ǵana emes, sondaı-aq árbir patsıentke túsinikti bolý úshin onyń aýdarmasy óte sapaly bolýy tıis. Óıtkeni, preparattyń ańdatpa-mazmunynda qatelik bolǵan jaǵdaıda patsıentter zardap shegýi múmkin. Al bql ulttyq qaýipsizdikpen baılanysty másele», – dep atap ótedi DZSUO bas dırektorynyń dárilik zattar jónindegi orynbasary Baıan Moldahmetova.
Onyń sózinshe, dárilik preparattar nusqaýlyqtarynyń mazmuny preparattyń ózin medıtsınalyq qoldaný barysynda ózgerýi múmkin ekenin eske salamyz. Sonymen, elimizde tirkelgen dárilik zattar búkil tirshilik aınalymy boıyna qaýipsizdik monıtorınginen ótkiziledi. Basqa preparattarmen ózara árekettesýi kezinde buryn nusqaýlyqta kórsetilmegen jaǵymsyz reaktsııalar nemese emdik áseri anyqtalǵan jaǵdaıda der mezgilinde ózektilendirý úshin qoldanystaǵy nusqaýlyqtarǵa ózgerister engizilýi tıis.
