Qazaqstanda bir jyl ishinde jumyssyzdar sany 4,6 paıyzǵa tómendedi

ASTANA. QazAqparat - Qazaqstandaǵy jumyssyzdyq deńgeıi 4,9 paıyzdy quraıdy. Bul týraly búgin «Kadrlardy daıyndaý júıesin jańǵyrtý: jaı-kúıi men bolashaǵy» atty konferentsııa barysynda «Kásipqor» holdıngi basqarmasynyń tóraıymy Eldana Sádýaqasova málim etti.

«Qazirgi ýaqytta Qazaqstandaǵy jumyssyzdar sany bir jyldyń ishinde 4,6 paıyzǵa azaıdy, al jumyssyzdyq deńgeıi 4,9 paıyzdy quraıdy. Bul rette ekonomıkanyń agroónerkásip, munaı hımııasy, taý-ken ónerkásibi syndy basymdyqty salalarynda 4,5 mıllıonnan astam nemese jumyspen qamtylǵan halyqtyń 54,5 paıyzy jumys isteıdi», - dedi ol.

Sonymen qatar onyń alǵa tartqan derekterine sáıkes, tehnıkalyq jáne kásiptik bilimi bar jumyspen qamtylǵandardyń úlesi jalpy jumyspen qamtylǵan halyqtyń 36,5 paıyzyn qurasa, damyǵan elderdegi bul kórsetkish 70 paıyzdan asyp jyǵylady.

«Bilimsiz jumyspen qamtylǵandardyń úlesi 30 paıyzdan kóp. Bul eldegi ónimdilik qarqynyna keri áser etedi. Osyǵan oraı «Nurly jol» baǵdarlamasyn, ındýstrııalandyrýdyń ekinshi besjyldyǵy jobalaryn jáne basqa da memlekettik baǵdarlamalardy júzege asyrý kezeńinde jańa joǵary tehnologııalyq óndiristi qurýǵa jne damytýǵa qabiletti jumysy mamandyǵy bar kadrlar qajet bolady», - dedi E.Sádýaqasova.