Qazaqstanda bir jasqa deıingi bala kútimine 74 mlrd teńge járdemaqy tólendi
ASTANA. QazAqparat - 2017 jyly Memlekettik áleýmettik saqtandyrý qorynan Qazaqstannyń 772 myńnan astam azamaty tólem alǵan, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
2017 jyly Memlekettik áleýmettik saqtandyrý qorynyń tólemi 157 mlrd teńgeni qurady. Júktilik pen bosaný, jańa týǵan balany asyrap alý boıynsha áleýmettik tólem shyǵyndary 62,6 mlrd teńge bolsa, bir jasqa deıingi bala kútimine - 74 mlrd teńgeden astam, eńbekke jaramdylyqty joǵaltý boıynsha - 9,9 mlrd teńge, asyraýshysynan aıyrylý boıynsha - 7,8 mlrd teńge, jumystan aıyrylý boıynsha 2,1 mlrd teńge tólengen.
Júktilik pen bosaný, jańa týǵan balany asyrap alý boıynsha memlekettik áleýmettik saqtandyrý qory tóleminiń ortasha kólemi shamamen 370 myń teńgeni qurady, mundaı tólemdi 180 myńnan astam qazaqstandyq aldy.
Bir jasqa deıingi bala kútimi boıynsha áleýmettik tólemniń ortasha kólemi 26 myń teńgeden asty, mundaı tólem 435 myńnan astam azamatqa berildi.
Jumystan aıyrylý jaǵdaıy boıynsha áleýmettik tólem 36 myń adamǵa berildi, onyń ortasha kólemi 21 myń teńgeni qurady.
42 myńnan astam qazaqstandyq asyraýshysynan aıyrylý jaǵdaıy boıynsha áleýmettik tólemmen qamtyldy, onyń ortasha kólemi 15 myń teńgeni qurady. Taǵy 79 myń turǵyn eńbekke jaramdylyqty joǵaltý boıynsha 12 myń teńgeden áleýmettik tólem aldy.
Eske sala ketsek, Qazaqstanda Mindetti áleýmettik saqtandyrý qory eńbekke jaramdy halyqty áleýmettik qorǵaýdyń qosymsha formasy retinde engizildi.
