Qazaqstanda bir táýlikte úsh adam sýǵa ketti
ASTANA. QazAqparat - 14 maýsym kúni Qazaqstanda ruqsat etilmegen jerde shomylǵan 3 adam sýǵa ketip, mert boldy. Bul týraly QazAqparat tilshisi QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap habarlaıdy.
Belgili bolyp otyrǵandaı, úsh oqıǵanyń ekeýi ruqsat etilmegen jerde sýǵa túsýdiń saldarynan bolsa, úshinshi jaǵdaı balyq aýlap júrgen kezde oryn alǵan.
«Jambyl oblysynyń Shý aýdany Qonaev aýylynda túsýge tyıym salynǵan sýarý kanalyna 1968 jylǵy azamat batyp ketken. Sondaı-aq Atyraý oblysynyń Inder aýdany Inder kentindegi Oral ózeninde 2000 jyly týǵan bala sýǵa ketti», - dep atap ótti R.Imanqulov.
Sonymen qatar, 14 maýsym kúni Qyzylorda oblysynyń Qazaly qalasyndaǵy «Oń jaǵa» kanalynda balyq aýlap júrgen jerinde 1989 jylǵy azamat kóz jumǵan.
QR ІІM Tótenshe jaǵdaılar komıteti 11 maýsymdaǵy jaǵdaı boıynsha 35 adamnyń sýǵa ketkenin, olardyń 15-i balalar ekenin habarlady.
Komıtet demalys bastalǵandyqtan, ata-analarǵa balalaryna erekshe nazar aýdarýdy suraıdy.
