Qazaqstanda bir kúnde 6 adam gazdan ýlanyp, aýrýhanaǵa tústi
ASTANA. QazAqparat - Tótenshe jaǵdaılar mınıstrligi bir táýlikte 6 adamnyń gazdan ýlanǵanyn málimdedi, dep habarlaıdy QazAqparat.
8 naýryz saǵat 23:07-de Semeı qalasynyń «101» pýltine jedel járdem stansasynyń kezekshi dıspetcherinen Tsvetochnaıa kóshesinde tórt balanyń gazdan ýlanǵany týraly habar túsken.
Aqparat jınaý barysynda jeke turǵyn úıde qatty otynmen jylytylatyn peshti paıdalaný erejesin buzǵandyqtan tútin murjasy tartylmaı qalǵany belgili boldy.
Sol sebepti 4 jáne 5 jasar balalar ýly gazdan jeńil dárejede ýlanǵan. Olar dárigerler teksergennen keıin úıine jiberildi.
Sondaı-aq, 11 jáne 7 jasar balalar gazdan ortasha dárejede ýlanyp, dárigerler teksergennen keıin Semeı qalasynyń «Búırek ortalyǵy» mekemesine toksıkologııa bólimshesine jatqyzyldy.
Sondaı-aq, Soltústik Qazaqstan oblysynda 8 naýryzda saǵat 02:52-de Ǵ. Músirepov atyndaǵy aýdannyń ortalyq aýrýhanasyna Novoıshımskoe aýylyndaǵy aýdan ortalyǵynyń kóppáterli turǵyn úıindegi jaldamaly páterde turatyn 1976 jyly týǵan áıel jáne 1977 jyly týǵan er adam jatqyzylyp, qajetti em aldy.
Qazir olardyń ómirine qaýip tónip turǵan joq, aýrýhanadan úıine shyǵaryldy.
Páterdi tekserý kezinde jylytý peshiniń murjasy kúıege toly ekeni anyqtaldy, nátıjesinde tartylý bolmaı, gaz bólmege shyqqan. Sondaı-aq, pesh pen murjada jaryq bolǵan.
Osy fakti boıynsha turǵyn úı ıesi QR ÁQBtK-niń 410-baby 3-bóligi boıynsha ákimshilik jaýapkershilikke tartyldy.
2022 jyly SQO eldi mekenderinde 28 adam ýly gazdan ýlanǵan, jyldyń basynan beri - 22 adam ýlanyp, bir adam kóz jumdy.
