Qazaqstanda bir ǵana kásiporynda aı saıyn 100 keli altyn urlanady
ASTANA. QazAqparat -Altyn óndiretin kásiporyndar atalǵan shıkizatty zańsyz óndirý jáne satý áreketteri úshin jaýapkershilikti kúsheıtýdi surap otyr. Sebebi bir ǵana «Qazaqaltyn»taý-ken kombınatyna qarasty shahtalarda aı saıyn júzdegen keli altyn urlanady, dep habarlaıdy QazAqparat tilshisi.
«Iá, bizdiń esebimizge sáıkes, kombınatqa qarasty ken oryndarda aı saıyn zańsyz jolmen 100 keli altyn urlanady. Sonyń saldarynan kompanııaǵa biraz shyǵyn kelip otyr. Oǵan qosa, bıýdjetke mıllıondaǵan salyqtar túspeı jatady», - dedi «Qazaqaltyn»kompanııasynyń bas dırektory Evgenıı Balashov Taý-ken óndirýshi jáne taý-ken metallýrgııa kásiporyndary qaýymdastyǵynyń keńesinde.
Onyń aıtýynsha, búginde kompanııaǵa qarasty nysandardyń terrıtorııasyna zańsyz kirip, shahtalar men karerlerge túsý oqıǵalary azaıatyn emes. Altyndy óz betimen izdeıtinder kenishterdiń oqpandary men oıyqtary arqyly jerdiń astyna túsip, baǵaly shıkizatty urlap júr. Olardyń ishinde jergilikti halyqtan bólek ózge oblystardyń azamattary, tipti kórshi elderden keletinder de barshylyq.
«Shahtaǵa zańsyz túsetinder burǵylaý quraldary men jarylǵysh zattardy paıdalanyp, jumysshylardyń ómiri men densaýlyǵyna qaýip tóndiredi. Ondaı kásip esh tolastaıtyn emes. Sebebi eldi mekenderde altyn rýdasyn óńdeý men satyp alý oryndary bar. Búginde osy saladaǵy zańnamany jetildirý kerek. Sonda ǵana zańsyz altyn óńdeý kásibine tusaý salýǵa bolady», - deıdi «Qazaqaltynnyń» basshysy.
