Qazaqstanda bıotehnologııany damytý jáne ǵylymı óńdeýlerdi úılestirý boıynsha vedomstvoaralyq komıssııa qurylady
ASTANA. 8 qyrkúıek. QazAqparat - Búgin Qazaqstan Respýblıkasynyń Bilim jáne ǵylym mınıstri Baqytjan Jumaǵulovtyń tóraǵalyǵymen Qazaqstandaǵy bıotehnologııany damytý bolashaǵy máselesi boıynsha keńes ótkizildi.
Oǵan bıotehnologııalar salasyndaǵy jetekshi ǵalymdar men sarapshylar, Qazaqstan Respýblıkasy Ulttyq bıotehnologııa ortalyǵynyń qyzmetkerleri qatysty, dep habarlady atalmysh vedomostvonyń baspasóz qyzmeti.
Keńeste Ulttyq bıotehnologııa ınstıtýtynyń aǵymdaǵy jaǵdaıy men iske asyrylyp otyrǵan ǵylymı zertteýler týraly habarlama tyńdaldy. Otyrys barysynda bıotehnologııany odan ári damytý máseleleri talqylandy.
Elbasynyń ınteraktıvti dárisinde bilim jáne ǵylym júıesiniń aldyna ınnovatsııalyq ınfraqurylymnyń barlyq spektrin damytý, ınnovatsııalyq qyzmetti júzege asyratyn kásibı kadrlar daıarlaý týraly naqty mindetter qoıyldy.
Mınıstrdiń pikirinshe, el Prezıdenti qoıǵan aýqymdy maqsattarǵa qol jetkizý úshin bilim berý júıesiniń mol múmkindigi, qajetti resýrstary men tetikteri bar. Eń bastysy, bul áleýetti tıimdi paıdalanyp, Elbasynyń barlyq tapsyrmalaryn oryndaýdy, ınnovatsııalyq bilim berýdiń qazaqstandyq modelin qalyptastyrýdy qamtamasyz etý qajet.
Basqosý barysynda aıtylyp ótkendeı, Qazaqstanda bıotehnologııa salasynda edáýir tájirıbe jınaqtalǵan jáne kelesheginen úmit kúttiretin ǵylymı jobalar ázirlengen. Elimizdegi bıotehnologııany damytýdyń biryńǵaı júıeli tásili ǵylymı, bilim berý mekemeleriniń, óndiristik kásiporyndardyń, bıznes qurylymdardyń kúshin biriktirip, osy salanyń damýyn jedeldetýge múmkindik beredi.
Otyrys qorytyndysy boıynsha Qazaqstan Respýblıkasynda atalmysh salany keshendi damytý boıynsha birqatar tapsyrmalar berildi.
Bul tapsyrmany iske asyrý úshin elimizde bıotehnologııany damytý, ǵylymı zertteýlerdi úılestirý jáne olardy tájirıbege endirý úshin múddeli memlekettik organdardyń qatysýymen vedomostvoaralyq komıssııa qurý týraly sheshim qabyldandy.
