Qazaqstanda «Bıoparoks» antıbıotıgi satylymnan alynyp tastalady - DSÁDM

ASTANA. QazAqparat - Qazaqstanda janama allergııalyq áser múmkindigine baılanysty patsıentter keńinen qoldanylyp kelgen «Bıoparoks» antıbıotıgi satylymnan alynyp tastalady. Bul týraly brıfıngte QR Densaýlyq saqtaý jáne áleýmettik damý mınıstrligi Medıtsınalyq jáne farmatsevtıkalyq qyzmetti baqylaý komıteti tóraǵasy mindetin atqarýshy Larısa Pak málim etti.

«Farmatsevtıkalyq baqylaý aıasynda dárilik zattardyń janama áserleriniń monıtorıngtik bazasy biz úshin qoljetimdi. Sonyń ishinde Eýropalyq bazalarmen de baılanys bar. Sondyqtan da, biz atalǵan preparatty satylymnan qaıtaryp alý týraly sheshim qabyldadyq. Bul búkil respýblıka boıynsha júrgizilip jatyr», - dedi L.Pak.

Onyń sózine qaraǵanda, Dárilik zattardy retteý jónindegi eýropalyq agenttik «Bıoparoks» máselesimen byltyrǵy jyldyń qyrkúıeginen bastap aınalysqan. «Aqpan aıynyń sońyna taman «Bıoparoks» antıbıotıgin álem boıynsha satylymnan qaıtaryp alý týraly sheshim qabyldanǵan. Agenttik preparat allergııalyq áser beredi degen qorytyndyǵa kelip otyr», - dedi L.Pak.

Eske sala keteıik, buǵan deıin Servier kompanııasy tamaqqa sebetin «Bıoparoks» (fýzafýngın) tamaq spreıin álem boıynsha satylymnan alyp tastaý týraly sheshim qabyldaǵan bolatyn.