Qazaqstanda bıologııalyq qospa shyǵarýshy kompanııalar memlekettik tirkeýden shyǵaryldy

ASTANA. QazAqparat - Tutynýshylardyń quqyqtaryn qorǵaý komıteti «ALI KAPS» jáne «Sealeks forte» BAQ-tyń memlekettik tirkeý týraly kýálikterin keri qaıtarý jáne kúshin joıý bóliginde komıtettiń paıdasyna sheshilgen sot sheshimin aldy. Bul týraly komıtettiń saıtynda habarlandy.

Tutynýshylardyń quqyqtaryn qorǵaý komıteti komıtettiń buıryǵymen quramynda memlekettik tirkeý kezinde málimdelmegen «Tadalafıl» dárilik zatynyń anyqtalýyna baılanysty «ALI KAPS» («ALI CAPS»), «Sealeks forte» («SEALEX FORTE») bıologııalyq aktıvti qospalarynyń memlekettik tirkeý týraly kýálikterin keri qaıtardy jáne kúshin joıdy.
Ónimniń óndirýshisi Reseı Federatsııasy, Sankt-Peterbor qalasy, «VIS» JShQ bolyp tabylady. «VIS» JShQ Astana qalasynyń Arnaıy aýdanaralyq ekonomıkalyq sotyna «ALI KAPS» («ALI CAPS»), «Sealeks forte» («SEALEX FORTE») taǵamǵa bıologııalyq aktıvti qospalaryn memlekettik tirkeýdi keri qaıtarý jáne olardyń memlekettik tirkeý týraly kýálikteriniń kúshin joıý týraly komıtettiń buıryǵyn zańsyz dep taný jáne kúshin joıý týraly ótinishpen QR Ulttyq ekonomıka mınıstrligi Tutynýshylardyń quqyqtaryn qorǵaý komıteti MM-ne talap-aryzben júgindi.

2016 jyldyń 27 shildesinde Astana qalasynyń Arnaıy aýdanaralyq ekonomıkalyq soty ashyq sot otyrysynda osy azamattyq isti qarap, «VIS» JShQ-nyń talaptaryn qanaǵattandyrýdan bas tartty.

14 qyrkúıekte «VIS» JShQ Astana qalasynyń Arnaıy aýdanaralyq ekonomıkalyq sotynyń 27 shildesindegi sheshimine shaǵymdanýyna baılanysty osy is Astana qalasynyń sotynda appelıatsııalyq turǵyda qaraldy. Qalalyq soty 27 shildesinde Astana qalasynyń Arnaıy aýdanaralyq ekonomıkalyq sotynyń osy is boıynsha sheshimin ózgerissiz, al apellıatsııalyq shaǵymdy qanaǵattandyrýsyz qaldyrdy.