Qazaqstanda bıofarmatsevtıkalyq ónim shyǵaratyn zaýyt salynady
ASTANA. KAZINFORM - $200 mln ınvestıtsııaǵa ıe halyqaralyq kompanııa tolyq tsıkldi ınnovatsııalyq bıofarmatsevtıkalyq hab salmaq. Jobany jańa perspektıvaly Alataý qalasynda júzege asyrý josparlanyp otyr, oǵan jer telimi bólingen, dep habarlaıdy Úkimettiń baspasóz qyzmeti.
Bul týraly KGIR-2025 konferentsııasy aıasynda R-Pharma dırektory Nıkolaı Zemskov málimdedi.
«Memleket basshysynyń dári-dármek óndirisin lokalızatsııalaýdy 50% úleske jetkizý jáne dárilik ári bıoqaýipsizdikti qamtamasyz etý jónindegi tapsyrmasyna sáıkes biz birlesken kásiporyn qurdyq. Qazir Qazaqstan Respýblıkasynyń Úkimetimen ınvestıtsııalyq kelisim jasalýyn kútip otyrmyz. Joba ınvestıtsııalyq shtabtyń maquldaýynan ótti. Bizge Prezıdenttiń óz Joldaýynda aıtqan bolashaqtyń eń perspektıvaly qalasy – Alataýdan jer telimi berildi», — dedi KGIR-2025 alańynda «R-Farma» kompanııasynyń dırektory Nıkolaı Zemskov.
Birneshe júzdegen jumys oryndaryn quratyn jáne jergilikti mártebesi bar ónimderdi tek ishki naryqqa ǵana emes, sonymen qatar eksportqa da shyǵaratyn ınnovatsııalyq habty úsh jyl ishinde júzege asyrý josparlanyp otyr. Sondaı-aq kompanııa dári-dármek qunyn ár úsh jyl saıyn shamamen 20%-ǵa tómendetýge mindetteme aldy, bul eksporttan túsetin tabys arqyly óteledi.
«Bizdiń aktsıonerler úshin Qazaqstanda tolyq tsıkldi bıofarmatsevtıkalyq keshenge ınvestıtsııa salý jáne onyń qurylysyn turǵyzý týraly sheshim qabyldaýǵa túrtki bolǵan mańyzdy qadamdardyń biri – ınvestıtsııalyq ahýal deńgeıi, sondaı-aq memleket tarapynan dáıekti qoldaý men berilgen artyqshylyqtar. Qazaqstan aımaqtaǵy negizgi hab retindegi óz orynyn tolyq kólemde aqtaıdy. Biz 2009 jyldan bastap otandyq farmatsevtıkalyq ónim óndirýshini qoldaý elementteri únemi jaqsaryp kele jatqanyn kórip otyrmyz», — dep atap ótti ınvestor.
Joba seriktesi – Khan Tengri Biopharma kompanııasy.
«Zaýytty iske qosý óndiriletin ónim baǵasynyń turaqty bolýyn qamtamasyz etedi. Birlesken seriktestik aıasynda kásiporyndar el úshin ómirlik mańyzdy jáne strategııalyq preparattardy shyǵarady – bul ulttyq qaýipsizdik máselesi», — dep atap ótti kompanııa basshysy Asqar Karımýllın.
Osyǵan deıin shveıtsarııalyq kompanııanyń Qazaqstannyń agroónerkásip keshenine $700 mln-nan astam ınvestıtsııa salatyny týraly jazdyq.