Qazaqstanda byltyr jol apatynan 285 bala qaza tapty
ASTANA. KAZINFORM – Balalardyń joldaǵy qaýipsizdigin qamtamasyz etý máselesi ózekti bolyp qala beredi. Balalar – jol qozǵalysyna qatysýshylardyń eń osal sanattarynyń biri jáne eresekter tarapynan erekshe nazar men jaýapkershilikti talap etedi.
Bul týraly Ortalyq kommýnıkatsııalar qyzmeti alańynda ótken brıfıngide Іshki ister mınıstrligi Ákimshilik polıtsııa komıteti tóraǵasynyń orynbasary Ǵalym Sarǵulov málimdedi.
– Jyl saıyn júrgiziletin túsindirý jumystaryna qaramastan, balalardyń qatysýymen bolatyn jol-kólik oqıǵalary máselesi ózekti kúıinde qalyp otyr. Ókinishke qaraı, ótken jyly jol-kólik oqıǵalary saldarynan 285 bala qaza tapty. Bul – jol berýge bolmaıtyn shyǵyn, - dedi spıker.
Onyń aıtýynsha, zardap shekken kámeletke tolmaǵandardyń jartysynan astamy kólik quraldarynyń jolaýshylary bolǵan. Qalǵandary – jaıaý júrginshiler, onyń ishinde velosıpedshiler, samokat paıdalanýshylar jáne moped júrgizýshileri.
– Kóp jaǵdaıda zardap shekken balalar eresekter tarapynan tasymaldaý qaǵıdalarynyń buzylýymen, ıaǵnı arnaıy balalar qurylǵylarynsyz nemese qaýipsizdik beldigin taqpaı tasymaldanǵan. Jol qozǵalysy qaýipsizdigi júrgizýshilerge de, jaıaý júrginshilerge de baılanysty. Táýekel eki tarapta da bar, - dedi ol.
Sondaı-aq brıfıng barysynda Ǵalym Sarǵulov jol-kólik oqıǵalarynyń sebepteri retinde jaıaý júrginshilerdiń, sonyń ishinde kámeletke tolmaǵandardyń belgilenbegen jerden nemese tyıym salynǵan baǵdarsham belgisinde joldy kesip ótýi jıi tirkeletinin atap ótti.
– Balalar keıde jol jaǵdaıyn durys baǵalamaı, burylys nemese toqtap turǵan kólik artynan kólik kenetten shyǵyp qalýy múmkin ekenin eskermeıdi. Qarańǵy ýaqytta júrgizýshilerge jaıaý júrginshilerdi baıqaý qıynyraq, ásirese kıiminde jaryq shaǵylystyratyn elementter bolmaǵan jaǵdaıda. Sondyqtan balalarǵa joldan óter aldynda júrgizýshimen mindetti túrde kózben baılanys ornatýdyń jáne asa muqııat bolýdyń mańyzdylyǵyn túsindirý qajet, - dep tolyqtyrdy spıker.
Aıta keteıik Úkimet 2026-2030 jyldarǵa arnalǵan «Qazaqstan balalary» tujyrymdamasyn bekitti.