Qazaqstanda byltyr 12 tonnadan astam esirtki tárkilendi
ASTANA. KAZINFORM – Qazaqstanda ótken jyly 12 tonnadan astam esirtki tárkilendi. Bul jóninde QR Іshki ister mınıstrligi resmı saýalymyzǵa joldaǵan jaýabynda málimdedi.
– 2025 jyly 1 tonna 189 keli sıntetıkalyq esirtki, 10,1 tonna marıhýana, 857 gramm kokaın, 715 keli gashısh, 466 gramm geroın tárkilendi, - delingen habarlamada.
Sondaı-aq esirtki qylmysyn jasaǵany úshin 5 758 adam qylmystyq jaýapkershilikke tartylǵan. Olardyń 74-i kámeletke tolmaǵandar. Aıta keteıik mundaı qylmys úshin azamattarǵa 16 jastan bastap qylmystyq jaýapkershilik qarastyrylǵan.
– 2025 jyly 13 esirtki zerthanasy anyqtalyp joıyldy. Byltyr 1 naýryzda esirtki bıznesin uıymdastyrýshylarǵa qatysty zańnamanyń kúsheıtilgenine baılanysty olardyń sany aldyńǵy jyldarmen salystyrǵanda azaıǵan. 2021 jyly 17, 2022 jyly 20, 2023 jyly 29, 2024 jyly 37 esirtki zerthanasy joıylǵan bolatyn, - delingen resmı jaýapta.
Sonymen birge 2025 jyly esirtkini jarnamalaýmen jáne satýmen aınalysqan 10 289 onlaın-resýrs joıyldy.
Eske salaıyq, buǵan deıin Almatyda esirtki qylmysyna qatysy bar 28 sheteldik jaýapqa tartylǵanyn jazǵanbyz.