Qazaqstanda bilimdi qoǵam mádenıetin qalyptastyrý tujyrymdasy ázirlenedi
NUR-SULTAN. QazAqparat – Elimizde bilimdi qoǵam mádenıetin qalyptastyrý maqsatynda arnaıy tujyrymdama ázirlenbek, dep habarlaıdy QazAqparat tilshisi.
«Endigi memlekettik saıasattyń basty mindeti - «Jańa Qazaqstandy» qurý. Jańa ekonomıkalyq saıasatty iske asyryp, halyq tabysyn arttyrý. Bul biri-birimen tyǵyz ushtasyp jatqan mindetter. Ony nátıjeli iske asyrýda azamattardyń bilim deńgeıi men mádenıeti sheshýshi ról atqarady. Sondyqtan bilim salasynyń aldynda turǵan basty maqsat - bilimdi qoǵam mádenıetin qalyptastyrý. Otandyq joǵary oqý oryndarynda bilim alýshylar boıyna bilim men biliktilikke qushtarlyqty, eńbeksúıgishtikti, qoǵam aldyndaǵy jaýapkershilikti qalyptastyrý jetekshi orynǵa ıe bolýy tıis», - dedi QR Premer-mınıstriniń orynbasary Eraly Toǵjanov elordada ótip jatqan «Adamı kapıtal – jańa Qazaqstan damýynyń negizgi resýrsy» atty ǵylym jáne joǵary bilim forýmynda.
Onyń aıtýynsha, stýdentterdiń bilimin baǵalaýdan bólek, olardyń tulǵalyq, adamgershilik turǵydan damý deńgeıin de eskerýi tıis.
«Qundylyqqa negizdelgen oqytý – qoǵam aldyndaǵy joǵary áleýmettik jaýapkershiligi bar tulǵa qalyptastyrýǵa múmkindik beredi. Osy oraıda ǵylym jáne joǵary bilim mınıstrligine múddeli memlekettik organdarmen, akademııalyq qaýymdastyqpen birge «Bilimdi qoǵam mádenıetin qalyptastyrý tujyrymdamasyn» ázirleýdi tapsyramyn», - deıdi ol.
Sondaı-aq, Premer-Mınıstrdiń orynbasary joǵary oqý oryndarynyń sapaly kadr daıarlaýda jaýapkershiliktiń artyp otyrǵanyn erekshe aıtty.
«Ózderińizge keıbir ýnıversıtetterge akademııalyq erkindik berildi. Alaıda, joǵary oqý oryndarynyń damýyn árdaıym mınıstrlik baqylaýynda ustaý mańyzdy. Osyǵan baılanysty ýnıversıtetter qyzmetin baǵalaýdyń jańa krıterııleri ázirlenetin bolady», - dedi E. Toǵjanov.
