Qazaqstanda bilim sapasy tómen taǵy 29 JOO jabylady
ASTANA. 18 maýsym. QazAqparat -Aldaǵy ýaqytta elimizde bilim berý sapasy tómen taǵy 29 joǵary oqý orny jabylatyn bolady.
Bul týraly búgin Májilistegi Úkimet saǵatynda Bilim jáne ǵylym mınıstri Baqytjan Jumaǵulov málim etti.
«Biz buǵan deıin 6 ýnıversıtetti jaýyp edik. Endigi kúni, aǵymdaǵy jyl barysynda taǵy 29 ýnıversıtetti jabýdy josparlap otyrmyz. Jalpy alǵanda joǵary oqý oryndaryn jabý bilim mekemeleriniń reıtıngin esepke ala otyryp, júıeli túrde sot tártibimen júzege asatyn bolady. Biz joǵary oqý oryndaryn 5-6 krıterıı boıynsha tekseremiz. Árbir ýnıversıtettiń reıtıngin de qadaǵalaımyz. Eń basty kórsetkish - bul túlekterdiń bilim jetistigine baılanysty jáne ol 30 paıyzdy quraıdy», - deıdi mınıstr.
Onyń sózine qaraǵanda, budan bólek, joǵary oqý oryndarynyń ǵylymı kórsetkishter, oqytýshylardyń deńgeılik kórsetkishteri de sapaǵa qamtylyp, baǵalanady.
«Joǵary oqý oryndaryn jabý úshin bizdiń sotqa shaǵymdanýymyzǵa týra keledi. Ol turǵydan qarjylyq shyǵyn da talap etiledi. Jalpy, sapasy tómen ýnıversıtetterdi jabý biz úshin shynymen kúrdeli ári qıyndyqtarǵa tótep berýimizge týra keledi, kedergileri qanshama», - deıdi B. Jumaǵulov.
