Qazaqstanda bilim salasyna vaýcherlik qarjylandyrý engizilmek
NUR-SULTAN. QazAqparat - Qazaqstanda orta bilim salasyna vaýcherlik qarjylandyrýdy engizý máselesi pysyqtalyp jatyr. Bul jaıynda QR Premer-Mınıstriniń orynbasary Eraly Toǵjanovtyń Májilis depýttarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Qazirgi ýaqytta mınıstrlik (Bilim jáne ǵylym mınıstrligi) «aqsha oqýshymen birge júredi» qaǵıdatyn tolyǵymen júzege asyratyn bilim berý salasyna vaýcherlik qarjylandyrýdy engizý máselesi boıynsha jumys istep jatqanyn habarlaımyz. Sonymen qatar, jan basyna qarjylandyrýǵa kóshken orta bilim berý uıymdarynda bultty býhgalterııany engizý máselesi qarastyrylýda», - dedi Eraly Toǵjanov.
Onyń atap ótýinshe, bultty býhgalterııany iske asyrý mektepterdiń bıýdjet qarajatynyń jumsalýyna monıtorıng júrgizýge jáne baqylaýǵa keıinnen ulttyq bilim berý derekter qoryna málimetterdi jınaqtaýǵa múmkindik beredi.
«Búgingi kúni Ulttyq bilim berý derekter qory Ádilet mınıstrliginiń «Jeke tulǵa» jáne «Zańdy tulǵa» sekildi memlekettik derekter qorymen, Eńbek jáne halyqty áleýmettik qorǵaý, Tsıfrlyq damý, ınnovatsııalar jáne aeroǵarysh ónerkásibi mınıstrlikteriniń jáne taǵy basqa júıelermen ıntegratsııalanǵan», - dedi Úkimet basshysynyń orynbasary.
