Qazaqstanda Bilim mınıstrligi men Joǵary bilim jáne ǵylym mınıstrligin qurý usynyldy
NUR-SULTAN. QazAqparat – Búgin Parlament Senatynyń jalpy otyrysynda depýtat Murat Baqtııaruly Bilim jáne ǵylym mınıstrligin ekige bólýdi usyndy, dep habarlaıdy QazAqparat tilshisi.
«Álemdik pandemııa bilim salasyna úlken soqqy berdi. Mysaly, Baıqońyr qalasynda Reseı quzyretine qaraıtyn jeti mekteptiń barlyq synyp oqýshylary tolyqqandy dástúrli túrde oqyp jatsa, al ondaǵy qazaqstandyq mektepterdiń oqýshylary qashyqtan oqyp jatyr. Muny qalaı túsinýge bolady? Eki toqsan boıy jarytyp bilim almaǵan balalardyń, ásirese, aýyldyq mektepterdegi oqýshylardyń bilimin tolyq qalpyna keltirý qıynǵa soǵyp, bilim sapasyn birneshe jyldar keıinge shegeretini sózsiz. Sondyqtan da elimizdegi barlyq aýyldar men aýdandardaǵy mektepterde oqýshylardy dástúrli oqytýǵa shyǵarýymyz kerek», - dedi M. Baqtııaruly.
Sonymen qatar ol orta bilim berý júıesi óte kúrdeli ekenin, ol eldiń damýy úshin ólsheýsiz ról atqaratynyn atap ótti.
«Bilim jáne ǵylym mınıstrligi úzdiksiz bilim bilim berý júıesiniń, bala-baqshadan bastap joǵarǵy bilimnen keıingi ári joǵary bilimge deıingi barlyq problemalarmen shuǵyldanady. Bul óte úlken júkteme. Ol elimizdiń halqynyń jartysyn qamtıdy. Mundaı júkteme basqa birde-bir mınıstrlikte joq. Sondyqtan da mektepte bilim berý júıesin ońtaıly basqarý tıimdiligin qamtamasyz etý úshin Bilim jáne ǵylym mınıstrligi bazasynda shtat sanyn kóbeıtpeı eki mınıstrlik: Bilim mınıstrligi men Joǵary bilim jáne ǵylym mınıstrligin qurý pisip jetildi dep oılaımyn» - dedi senator.
