Qazaqstanda bilim berý júıesinde tárbıe berý isi boıynsha keshendi baǵdarlama ázirlenýde - QR BǴM
ASTANA. 1 aqpan. QazAqparat - 2012 jyly jekemenshik formasy men bilim berý deńgeıine qaramastan bilim berý júıesinde tárbıe berý jumysy boıynsha keshendi baǵdarlama ázirlenedi, dep habarlady Pm.kz saıtyna bergen suhbatynda QR Bilim jáne ǵylym mınıstrligi Jastar saıasaty departamentiniń dırektory Madııar Qojahmet.
«Jyl saıyn Elbasy Nursultan Nazarbaev memlekettik jastar saıasatynyń damýyna erekshe nazar bóledi», - dedi Madııar Qojahmet.
Onyń aqparatyna súıensek, tárbıe jumysynyń keshendi baǵdarlamasy balabaqshalar, mektepter, joǵary oqý oryndary, joǵary oqý ornynan keıingi bilim berý oryndaryndaǵy jastarǵa tárbıe berý úrdisin qamtıtyn bolady.
Sonymen qatar, Bilim jáne ǵylym mınıstrligi «Dıplommen aýylǵa!», «Jastar saıasaty», «Jasyl el» sııaqty jobalardyń júzege asyrylýyna úlken nazar bólip keledi.
