Qazaqstanda Bilim berý uıymdaryndaǵy birtutas tárbıe berý tujyrymdamasy ázirlenedi
«Qazirgi kezde eńbekke baýlýdyń urpaq tárbıesindegi mańyzy erekshe. Bıyl jańa oqý jylynan birinshi synyptan bastap Eńbekke baýlý páni qaıta engizildi. Sonymen qatar, alǵash ret mektepterde 7 synyptan bastap bolashaq mamandyqty tańdaýǵa baǵyttaıtyn pedagog-kásiptik baǵdar berýshi mamany engiziledi. Joba retinde mektepter janynda jylyjaılar ashý qolǵa alynýda. Qazirdiń ózinde 7 paıyzǵa jýyq mektepterde bul tájirıbe bar. Bilim uıymdary osy tájirıbeni taratýdy, balalardy mektep qabyrǵasynan bastap eńbekke baýlýdyń basqa da formalaryn damytýdy qolǵa alýy tıis», - dedi E.Toǵjanov Pedagogterdiń respýblıkalyq tamyz konferentsııasynda.
Onyń aıtýynsha, 100 kolledj janynan stýdentterdiń tájirıbe jınaqtaýyna arnalǵan shaǵyn kásiporyndar qurý iske asyrylyp jatyr. Kolledjderge qamqorlyqty júzege asyrý boıynsha 500-ge jýyq kásiporynmen kelisim bekitildi.
«536 kolledjge dýaldy oqytý formaty engizildi. Munyń barlyǵy balalardy eńbekqorlyqqa tárbıeleýge naryqqa qajetti mamandyqtardy úırenýine baǵyttalǵan. Ashat Qanatuly, jalpy balabaqsha men mektep qabyrǵasynda jáne kolledjderde júrgiziletin tárbıe jumystaryn bir júıege keltirý maqsatynda Jańa Qazaqstan jastaryn qalyptastyrýǵa baǵyttalǵan Bilim berý uıymdaryndaǵy birtutas tárbıe berý tujyrymdamasyn ázirleý qajet», - dedi E.Toǵjanov Oqý-aǵartý mınıstri Ashat Aımaǵambetovke qarata aıtqan sózinde.
Onyń paıymynsha, bul tujyrymdama balalardy bilimge qushtarlyqqa, jańa kásipter men ǵylymǵa umtylýǵa, jańashyldyq pen kreatıvti bolýǵa, eńbeksúıgishtikke; jaýapkershilikke, otansúıgishtik pen tarıhty qurmetteýge,, salt-dástúrimizben ómir súrýge tárbıeleýge baǵyttalýy tıis.
«Respýblıkadaǵy úzdik mektepterdi, bilikti pedagogterdi, ǵalymdardy, ata-analar qaýymdastyǵynyń qatysýymen jumys tobyn qura otyryp, tez arada Tujyrymdamany ázirleýge kirisýdi tapsyramyn. Bul Tujyrymdama árbir ustaz ben mekteptiń basty qujaty bolýy tıis», - dedi Úkimet basshysynyń orynbasary.
