Qazaqstanda bilim berý obektilerine kirýdi baqylaý kúsheıtilmek

NUR-SULTAN. QazAqparat – Memleket basshysynyń tapsyrmasy boıynsha 12 mamyrda Nur-Sultan qalasynda UQK Tóraǵasy Kárim Másimov Qazaqstan Respýblıkasy Terrorızmge qarsy ortalyǵynyń kezekten tys otyrysyn ótkizdi. Bul týraly QazAqparat UQK silteme jasap habarlaıdy.

Іs-shara barysynda Reseı Federatsııasynyń Qazan qalasyndaǵy № 175 mektep-gımnazııasynda jaqynda oryn alǵan qaıǵyly oqıǵanyń mán-jaıy qaraldy.

Qazaqstan Respýblıkasyndaǵy bilim berý mekemeleriniń aǵymdaǵy qaýipsizdik jaı-kúıi jáne oqýshy jastardyń radıkaldanýyna jol bermeý boıynsha qabyldanyp jatqan sharalar talqylandy.

Bilim berý júıesi obektilerin kirýdi baqylaý men dabyl belgisin berýdiń tıisti tehnıkalyq quraldarymen nyǵaıtý boıynsha sheshimder ázirlendi.

Jastar ortasynda zorlyq-zombylyq aktsııalaryn nasıhattaý jáne ony daıyndaý belgilerin anyqtaý mánine áleýmettik jeliler men Internetti monıtorıngteý tıimdiligin arttyrý joldary aıqyndaldy.

Balalar men jasóspirimder arasynda quqyq buzýshylyqtardyń aldyn alý, sondaı-aq olarǵa ýaqtyly psıhologııalyq kómek kórsetý sharalary jetildirildi.

TQO otyrysynyń nátıjeleri boıynsha tıisti hattamaǵa qol qoıyldy.

Eske sala keteıik, 11 mamyrda Qazan qalasyndaǵy Faızı kóshesindegi mektepte belgisiz eki adam oq jaýdyrǵan bolatyn.

Atys kezinde 8 adam qaza taýyp, taǵy 21 adam zardap shekkeni habarlaǵan edi.

Aıta keteıik, memleket basshysy Qasym-Jomart Toqaev Qazan qalasyndaǵy gımnazııada reseılik oqýshylardyń qaza tabýyna baılanysty Reseı Federatsııasynyń Prezıdenti Vladımır Pýtınge kóńil aıtty.

Qaıǵyly jaǵdaıǵa baılanysty Tatarstan Prezıdenti Rýstam Mınnıhanov 12 mamyrdy respýblıkada aza tutý kúni dep jarııalaǵan bolatyn.