Qazaqstanda bıiktigi 272 metrlik záýlim munara salynady
ASTANA. KAZINFORM — Alataý qalasynda alǵashqy záýlim ǵımarat – Iconic Complex kópfýnktsıonaldy kesheniniń irgetasyn qalaý rásimi ótti. Іs-sharaǵa Premer-mınıstrdiń orynbasary Qanat Bozymbaev qatysty. Bul týraly Úkimettiń baspasóz qyzmeti málim etti.
Jańa keshen Alataý qalasynda qalyptasyp jatqan iskerlik ortalyqtyń negizgi nysandarynyń birine aınalady. Investıtsııa kólemi $800 mln-nan asatyn joba aıasynda bıiktigi 272 jáne 78 metr bolatyn eki munara salynady. Munda keńseler, turǵyn úı, qonaqúı, saýda oryndary men qoǵamdyq keńistikter ornalasady.
Saltanatty rásimde sóz sóılegen Qanat Bozymbaev Alataý qalasynyń damýy Prezıdent Qasym-Jomart Toqaevtyń turaqty baqylaýynda ekenin atap ótti. Memleket basshysynyń bastamasymen qalada ınvestorlarǵa qolaıly jaǵdaı jasaýǵa jáne zamanaýı basqarý júıesin qalyptastyrýǵa baǵyttalǵan arnaıy quqyqtyq rejım kezeń-kezeńimen engizilip otyr.
Qabyldanyp jatqan sharalar ınvestıtsııalyq belsendiliktiń artýyna yqpal etedi. 2026 jyldyń toǵyz aıynda Alataý qalasynyń negizgi kapıtalyna salynǵan ınvestıtsııa kólemi 1,6 esege ósip, 70,3 mlrd teńgege jetti. Jalpy qalanyń ınvestıtsııalyq portfelinde quny shamamen $6,9 mlrd-ty quraıtyn 67 joba bar. Olardy júzege asyrý nátıjesinde 55 myńǵa jýyq jumys ornyn ashý kózdelgen.
Investıtsııalyq jobalardy júzege asyrýmen qatar qalanyń ınfraqurylymy da damyp keledi. Qazirgi ýaqytta rezervten 35,3 mlrd teńge bólingen 28 joba boıynsha jumys júrgizilýde. Atap aıtqanda, «Kókpa-1» qosalqy stansasy qaıta jańǵyrtyldy, sýmen jabdyqtaý nysandary salynyp, avtomobıl joldary jóndelýde. Bul jańa kásiporyndardy iske qosýǵa jáne qurylys jumystaryn odan ári júrgizýge qajetti jaǵdaı jasaıdy.
Vıtse-premer Iconic Complex kesheniniń qurylys sapasy men qaýipsizdigine erekshe nazar aýdardy. Ol belgilengen merzimderdi, seısmıkalyq qaýipsizdik pen energııa tıimdiligi talaptaryn qatań saqtap, sondaı-aq qazaqstandyq kompanııalar men mamandardy tartý qajettigin atap ótti.
Sonymen qatar arnaıy quqyqtyq rejım aıasynda halyqaralyq sarapshylardy tarta otyryp, jobalaý qujattamasyna táýelsiz tehnıkalyq saraptama júrgizý tetigi engizildi. Bul kúrdeli qurylys jobalaryn baǵalaý kezinde ozyq halyqaralyq tájirıbeni qoldanýǵa múmkindik beredi.
— Iconic Complex jobalaý men qurylys sapasynyń jańa standartyn qalyptastyryp, Alataýdyń zamanaýı qala retinde damýyna úles qosady dep senemiz. Joba belgilengen merzimde, sapa men qaýipsizdiktiń joǵary talaptaryn saqtaı otyryp júzege asyrylýy tıis, — dedi Qanat Bozymbaev.
Iconic Complex jobasynyń bas merdigeri — China State Construction Engineering Corporation (CSCEC) kompanııasy. Keshenniń sáýlettik tujyrymdamasyn amerıkalyq Skidmore, Owings & Merrill (SOM) sáýlet bıýrosy ázirledi. Qurylysty 2029 jyldyń sońyna deıin aıaqtaý josparlanǵan.
