Qazaqstanda bıyl izdeýde júrgen 700-den astam qylmysker ustaldy
ASTANA. KAZINFORM – Qazaqstanda qylmyskerlerdi izdestirýdiń tıimdiligin arttyrý boıynsha júıeli sharalar qabyldanyp, jyl basynan beri 706 izdeýdegi adam ustaldy, dep habarlaıdy Bas prokýratýra.
Bul sharalar Memleket basshysy Qasym-Jomart Toqaevtyń Ádiletti memleket qurý, zań ústemdigin jáne qoǵamdyq tártipti nyǵaıtý jónindegi tapsyrmalaryn iske asyrý aıasynda júzege asyrylyp jatyr. Prezıdent atap ótkendeı: «Ádilettilik, zań men tártip – bolashaq damýymyzdyń basty baǵdary».
Bas prokýratýra quqyq qorǵaý organdarymen birlesip, qylmyskerlerdi izdestirý tıimdiligin arttyrý jáne jazanyń bultartpastyǵy qaǵıdatyn qamtamasyz etý maqsatynda birqatar sharalar qabyldady. Atap aıtqanda:
-
izdestirý jumysyna qatysty normatıvtik-quqyqtyq baza jetildirildi;
-
izdestirýdegi adam memlekettik nemese basqa qyzmetterge júgingende, izdestirýdi bastamashy organǵa avtomatty habarlaý júıesi engizildi;
-
bet-álpetti taný fýnktsııasy bar beınebaqylaý kameralaryn paıdalaný belsendi júrgizilip jatyr.
- Memleket pen qoǵamnyń ózara is-qımyly negizinde, bıýdjet qarajatyn paıdalanbaı-aq, halyq kóp jınalatyn jerlerge 3 myńnan astam beınebaqylaý kamerasy ornatyldy. Osy kameralar kómegimen 2024 jyly 72 qylmysker ustaldy. Mysaly, ótken jyldyń qazan aıynda Almatyda aýyr qylmys jasaǵany úshin 15 jyldan astam ýaqyt boıy izdestirýde júrgen qylmysker qolǵa tústi, - dep jazdy baqylaýshy organnan.
Sonymen qatar shetelden asa aýyr qylmystar jasaǵany úshin izdeýde bolǵan 28 adam elge qaıtaryldy. Olardyń ishinde kisi óltirý, qarjylyq pıramıdalar qurý, uıymdasqan qylmystyq topqa qatysý, alaıaqtyq jáne esirtki saýdasy boıynsha jaýapqa tartylǵandar bar.
Jalpy, ustalǵan 706 adamnyń ishinde:
-
14-i kisi óltirgeni úshin,
-
13-i esirtki satqany úshin,
-
34-i tonaǵany úshin,
-
141-i alaıaqtyq jasaǵany úshin,
-
269-y urlyq jasaǵany úshin izdeýde bolǵan.
Qabyldanǵan sharalardyń nátıjesinde izdestirýdegi adamdardyń jalpy sany 4,6%-ǵa, ıaǵnı 2226-dan 2123-ke deıin azaıyp, olardy ustaý tıimdiligi 63,7%-ǵa deıin artty.
Bas prokýratýra jazanyń bultartpastyǵyn qamtamasyz etý jáne eldegi quqyqtyq tártipti nyǵaıtý boıynsha jumystyń júıeli ári turaqty jalǵasatynyn atap ótti.
Aıta keteıik, Shymkentte bopsalaý jáne qaraqshylyqpen aınalysqan qylmystyq top ustaldy.