Qazaqstanda bıyl óndiristik qaýipsizdiktiń saqtalmaýynan 221 adam kóz jumdy
Elimizde bir jylda óndiristik qaýipsizdiktiń saqtalmaýynan 1195 adam zardap shekken. Bul týraly Eńbek jáne halyqty áleýmettik qorǵaý mınıstri Svetlana Jaqypova aıtty, dep habarlaıdy Kazinform.
«Kostenko apatynda 46 adam kóz jumdy. Statıstıkaǵa qarasaq, elimizde bir jylda óndiristik qaýipsizdiktiń saqtalmaýynan 1195 adam zardap shekken, 221 adam óndiristik qaýipsizdiktiń saqtalmaýynan qaza tapty. Mundaı jaǵdaılar elimizde bolmaý úshin barlyq memlekettik organdar birlesip jumys isteýi kerek. Biz ózimizdiń mınıstrlik tarapynan Prezıdent tapsyrmasyna sáıkes, qaýipti jaǵdaıda jumys isteıtin qyzmetkerlerdiń jaǵdaıyn jasaý tujyrymdamasyn ázirledik», - dedi mınıstr Jibek joly telearnasynyń «Ýáde» baǵdarlamasynda.
Tujyrymdama boıynsha, Eńbek kodeksine birqatar ózgerister engiziledi. Máselen, buzýshylyqtar oryn alsa, nysandardy aldyn ala eskertpeı tekserý múmkindigi bolady.
Aıta keteıik, 2024 jyldyń 1 qańtarynan bastap zııandy óndiriste jumys isteıtinderge 55 jastan keıin 208 myń teńgege deıin qosymsha aqy tólenedi.
