Qazaqstanda bıyl qandaı joldar ashylady
ASTANA. KAZINFORM – Qazaqstanda bıyl 11 myń shaqyrymnan astam avtomobıl joly qaıta jańǵyrtýdan, kúrdeli jáne ortasha jóndeýden ótip jatyr. Jyl sońyna deıin jaqsy jaǵdaıdaǵy respýblıkalyq mańyzy bar joldardyń úlesin 95 paıyzǵa, jergilikti joldardyń úlesin 92 paıyzǵa jetkizý josparlanǵan. Bul týraly Premer-mınıstrdiń birinshi orynbasary Nurlybek Nálibaev baıandady.
Eldegi avtomobıl joldary men eldi meken kósheleriniń jalpy uzyndyǵy 185 myń shaqyrymdy quraıdy.
— Bıyl 11 myń shaqyrymnan astam joldarymyz qaıta jańǵyrtýdan, kúrdeli jáne ortasha jóndeýden ótýde. Jyl sońyna deıin jaqsy jaǵdaıdaǵy respýblıkalyq mańyzy bar avtojoldar úlesi 95%-ǵa, al jergilikti mańyzy bar joldar úlesi 92%-ǵa jetedi, — dedi Nurlybek Nálibaev Úkimette ótken baspasóz máslıhatynda.
Bıyl jyl sońyna deıin «Rahman qaınarlary», «Petropavl — Reseı Federatsııasynyń shekarasy», «Qyzylorda — Jezqazǵan» jáne «Aqtóbe — Ulǵaısyn» joldary ashylady.
— Avtomobıl joldarynyń jaı-kúıine jeke toqtalǵym keledi. Memleket basshysy jol sapasyn birneshe ret oryndy synǵa aldy. Prezıdenttiń tapsyrmasy boıynsha elimizdegi barlyq avtomobıl joldaryna jaýapty organ retinde Kólik mınıstrligi aıqyndaldy. Jol qurylysynyń standarttaryn arttyrý jáne osy saladaǵy barlyq qatysýshylardyń joldyń sapasymen baılanysty jaýapkershiligin kúsheıtý maqsatynda meniń tóraǵalyǵymmen avtomobıl joldary salasyn reformalaý jónindegi jumys toby quryldy, — dep tolyqtyrdy N. Nálibaev.
Onyń aıtýynsha, jol salasyndaǵy ozyq halyqaralyq tájirıbeni zerdelep, joldardyń sapasyn jaqsartýǵa baǵyttalǵan naqty sheshimder ázirlep, kemshilikterdi joıýǵa baǵyttalǵan, onyń ishinde zańnamalyq sharalardy qamtıtyn tıisti is-qımyl jospary bekitilmek.
Sonymen birge, temirjol salasynda termınaldyq ınfraqurylym damyp keledi. Elimizde 46 logıstıkalyq ortalyq jumys isteıdi. 2030 jylǵa deıin taǵy 21 ortalyq salynady.
Seriktes elderdiń aýmaǵynda da syrtqy termınaldar jelisi damytylýda. Búginde 3 termınal jumys isteıdi, taǵy 7 joba iske asyrylady.
Eldegi temirjol vokzaldary ınfraqurylymyn jańǵyrtýdyń aýqymdy baǵdarlamasy bastaldy. Jeltoqsanda 121 vokzaldaǵy jumystar aıaqtalyp, el ıgildigine paıdalanýǵa berildi.
Buǵan deıin Nurlybek Nálibaev «Aýqymdy qurylys» qarajatynyń naqty qaı salalarǵa bólinetinin aıtyp berdi.
Eýrazııanyń kólik-logıstıka haby ataný úshin júk tasymaldaýshylarǵa jaǵdaı jasalady.
