Qazaqstanda bıyl 536 orman órti tirkeldi
ASTANA. KAZINFORM — Bıyl memlekettik orman qory aýmaǵynda 536 orman órti tirkeldi. Bul ótken jyldyń sáıkes kezeńimen salystyrǵanda 45,7 paıyzǵa kóp bolǵanymen, órtten zardap shekken aýmaq kólemi tórt ese azaıdy.
Bul týraly Tótenshe jaǵdaılar mınıstrliginde ótken brıfıngte Ekologııa jáne tabıǵı resýrstar mınıstrligi Memlekettik baqylaý, ormandy qorǵaý jáne saqtaý basqarmasynyń basshysy Nııaz Jolbarys málim etti.
Onyń aıtýynsha, bul nátıjege orman sharýashylyǵy mekemeleriniń materıaldyq-tehnıkalyq bazasyn kúsheıtý yqpal etken. Memleket basshysynyń qoldaýymen 2023 jyldan beri orman mekemelerine 2 251 órt sóndirý tehnıkasy satyp alynǵan.
— Qazirgi tańda orman sharýashylyǵy mekemeleriniń materıaldyq-tehnıkalyq jaraqtandyrylý deńgeıi 80 paıyzǵa jetti. Al «Semeı ormany» rezervatynda bul kórsetkish 100 paıyzdy quraıdy, — dedi basqarma basshysy.
Sonymen qatar mınıstrlik memlekettik orman qory aýmaǵynda órtti erte anyqtaý júıesin keńeıtý jumystaryn jalǵastyryp jatyr.
— Jospar boıynsha jyl sońyna deıin órtti erte anyqtaý júıesi qamtıtyn aýmaqty 5 mıllıon gektarǵa deıin ulǵaıtamyz. Qazirgi tańda bul jumystar Shyǵys Qazaqstan oblysynda jáne ortalyq óńirdegi alty memlekettik ulttyq tabıǵı park aýmaǵynda júrgizilip jatyr, — dedi Nııaz Jolbarys.
Aıta keteıik, buǵan deıin Semeı ormanyndaǵy órtke 800-den astam adam men 8 áýe kemesi jumyldyrylǵanyn jazǵan edik.
