Qazaqstanda bıyl 4 635 ata-ana jaýapkershilikke tartyldy

Jazǵy demalys bastalǵaly balalardyń bos ýaqytyn baqylaý ózekti máselege aınaldy. Osyǵan baılanysty polıtsııa kámeletke tolmaǵandar arasyndaǵy quqyq buzýshylyqtyń aldyn alý maqsatynda reıdtik is-sharalardy kúsheıtken. Sonyń nátıjesinde bir ǵana Shymkent qalasynda túngi ýaqytta 164 jasóspirimniń eresekterdiń qaraýynsyz kóshede júrgeni, al 22 kámeletke tolmaǵannyń oıyn-saýyq oryndarynda bolǵany anyqtalǵan.

Zańger Arjan Sádýaqastyń aıtýynsha, zańda balanyń túngi ýaqytta kóshede júrýine qatysty naqty talap belgilengen. Eger kámeletke tolmaǵannyń janynda zańdy ókili bolmasa, onyń kóshede júrýine ýaqyt boıynsha shekteý qoıylady.

— Mundaı ýaqytta balanyń qasynda ata-anasy bolsa ǵana kóshede júrýge ruqsat etiledi. Bul talap Neke jáne otbasy kodeksinde kózdelgen. Zańdy ókil retinde tek ata-anasy tanylady. Týǵan baýyry nemese basqa týystarynyń janynda júrýge ruqsat joq. Eger ata-anasy qasynda bolmasa, kámeletke tolmaǵandar saǵat 23:00–ge deıin ǵana kóshede júre alady. Alǵashqy jaǵdaıda polıtsııa eskertý jasaıdy, qaıtalansa ákimshilik aıyppul salynady. QR Ákimshilik quqyq buzýshylyq týraly kodeksiniń 127-babynda ata-analardyń nemese qamqorshylardyń óz mindetterin oryndamaǵany úshin jaýapkershilik kózdelgen, — dedi zańger Arjan Sádýaqas.

Mamannyń sózinshe, ata-ananyń jaýapkershiligi balanyń túngi ýaqytta kóshede júrýimen ǵana shektelmeıdi. Eger kámeletke tolmaǵan jasóspirim qoǵamdyq orynda balaǵat sóz aıtyp, ózgeniń múlkine zııan keltirse nemese qoǵamdyq tártipti buzsa, zań aldynda zańdy ókili jaýap beredi.

Jaz mezgilinde kópqabatty úılerdiń aýlalarynda balalardyń keshke deıin oınaýy da jıi kezdesedi. Mundaı jaǵdaıda da turǵyndardyń tynyshtyǵyn buzbaý talaby eskerilýge tıis.

— Turǵyn úı aýmaǵynda saǵat 23:00–den keıin shýlaýǵa bolmaıtynyn esten shyǵarmaý kerek, — dedi zańger.

Aıta keteıik, jaqynda Іshki ister mınıstrligi elektrsamokat pen mopedti kez kelgen jerge qaldyrýǵa bolmaıtynyn eskertti.