Qazaqstanda bıyl 2-6 jas aralyǵynda kezekte turǵan balalar sany eki esege qysqardy
ASTANA. KAZINFORM – Elimizde 2025 jyly 2-6 jas aralyǵyndaǵy balalardy sapaly mektepke deıingi tárbıe men oqytýmen qamtý deńgeıi 95,9 paıyzǵa jetti. Bul týraly Ortalyq kommýnıkatsııalar qyzmetinde ótken brıfıngide Oqý-aǵartý mınıstrliginiń ókilderi habarlady.
2019 jyldan bastap elimizde mektepke deıingi uıymdar sany 8,6%-ǵa artyp, 10 650-den 12 myńǵa jetti. Bul uıymdarda 1 mıllıonnan astam búldirshin tárbıelenip jatyr.
– Memleket basshysynyń tapsyrmasymen óńirlerde balabaqshalardy iske qosý jónindegi 2023-2027 jyldarǵa arnalǵan qadamdyq jospar bekitilgen, onyń aıasynda 2027 jylǵa deıin 300 myń oryn paıdalanýǵa berilýi tıis. 2023 jyldan bastap búginge deıin 182 myń jańa oryn ashyldy. Bıyl ótken jylmen salystyrǵanda kezektilik jalpy kezektilik 33,3 %-ǵa, 2-6 jas aralyǵynda kezekte turǵan balalar sany eki esege qysqardy, - dedi Oqý-aǵartý birinshi vıtse mınıstri Maıra Meldebekova.
Aıta ketý kerek, balalar úshin teń bastapqy múmkindikterdi qamtamasyz etý, balabaqshalar sanyn arttyrý maqsatynda mektepke deıingi bilim berý uıymdaryn turaqty memlekettik qoldaý júzege asyrylyp keledi. Osy maqsatta búgingi tańda barlyq memlekettik bilim berý uıymy, sondaı-aq jekemenshik balabaqshaldardyń 90 paıyzy memlekettik bilim berý tapsyrysymen qamtylǵan.
Aıta keteıik, 2025 jylǵy 1 jeltoqsandaǵy jaǵdaı boıynsha «Keleshek» biryńǵaı erikti jınaqtaý júıesi aıasynda 59 862 shot ashyldy, onyń ishinde bes jastaǵy 8 046 balaǵa bastapqy bilim berý kapıtaly tólendi. Qarasha aıynyń basynan bastap shottar sany 6177-ge ósti.