Qazaqstanda bıyl 10 sheteldik ýnıversıtettiń fılıaly ashylady
ASTANA. KAZINFORM — Bıyl Qazaqstanda sheteldik eń myqty 10 ýnıversıtettiń fılıaly ashylady. Bul týraly Ǵylym jáne joǵary bilim mınıstri Saıasat Nurbek «JibekJoly» telearnasyndaǵy «BúginLive» baǵdarlamasyna bergen eksklıýzıvti suhbatynda aıtty.
Onyń sózinshe bul jumys Prezıdenttiń tapsyrmasyna saı júzege asyrylyp jatyr. Negizgi maqsat — Qazaqstanda akademııalyq jáne zertteýshi hab qurý. Sondyqtan, sheteldiń úzdik 40 ýnıversıtet Qazaqstanda fılıal ashýǵa kelisim bergen.
— Úsh maqsat qoıyp otyrmyz biz. Birinshi: Qazaqstandy osy akademııalyq habqa aınaldyrý. Bul bizge ne beredi? Bizge shetelden stýdentter keledi. Qazaqstanǵa bıyl 31 myń jarym sheteldik stýdent keldi. Bul bizdiń tarıhı rekordymyz. Qytaıdan, Reseıden, Mońǵolııa, Ázerbaıjan, Indonezııa, Túrkııadan, AQSh, Germanııadan, Ońtústik Afrıkadan, Nıgerııadan kelip jatyr, — deıdi mınıstr Saıasat Nurbek.
Aıta keteıik, bul joly brıtandyq, amerıkalyq, Qytaıdyń, Reseıdiń ýnıversıtetteri tek qana eki jaqty baǵdarlama qos dıplommen emes, tolyqqandy kampýstar ashýǵa keledi.
Nátıjesinde 100 mln dollarǵa jýyq ınvestıtsııa tartylady dep kútilip otyr.
Buǵan deıin Astanada Kardıf ýnıversıtetiniń tolyqqandy kampýsy ashylǵanyn jazǵan bolatynbyz. Eske salaıyq, bul — zertteýshi formatyndaǵy Brıtanııanyń eń myqty ýnıversıtetteriniń biri.