Qazaqstanda bıdaı alqaptary qysqaryp, basqa daqyldar kóbirek egiledi
ASTANA. KAZINFORM – 2028 jylǵa qaraı Qazaqstandaǵy bıdaı alqaptary 855 myń gektarǵa qysqarady. QR Aýyl sharýashylyǵy mınıstri Aıdarbek Saparov eldegi egistik alqaptaryn ártaraptandyrý jumystary týraly aıtyp berdi.
«Bizdiń fermerlermen jáne ákimdiktermen birlesken mindetimiz – egis alqaptarynyń qurylymyn ártaraptandyrý, 2028 jylǵa qaraı bıdaı alqaptary 855 myń gektarǵa qysqarýy tıis, biraq ónimdilikti arttyrý sharalaryn qabyldaý kezinde jalpy alym tómendemeýge tıis», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.
Sonymen birge, 5 jyl ishinde qaraqumyq sııaqty áleýmettik mańyzy bar daqyldardy 50 myń gektarǵa arttyrý, maıly daqyldardy 3,7 mln gektarǵa jetkizý, jem-shóp alqaptaryn 500 myń gektarǵa ulǵaıtý josparlanǵan.
Al ońtústik óńirler úshin kúrish alqaptaryn qysqartý boıynsha ındıkatıvter ázirlendi. Bıyl egis kólemin 6 myń gektarǵa jáne aldaǵy 5 jyl ishinde 21 myń gektarǵa qysqartý mindeti tur.
«Týra osyndaı jumys maqta ósirý boıynsha da júrgizilýi kerek. Sonyń nátıjesinde shamamen 1,4 mlrd m3 sý únemdeledi. Qant qyzylshasy alqaptaryn 5 jylda 27 myń gektarǵa ulǵaıtý qajet, bul qantpen qamtamasyz etý deńgeıin 6-dan 45%-ǵa deıin arttyrady. Basqa da áleýmettik mańyzdy daqyldarynyń alańdaryn ulǵaıtý josparlary qoıyldy», - dedi Aýyl sharýashylyǵy mınıstri.
