Qazaqstanda beıneleý ónerin damytýǵa baǵyttalǵan baıqaýdyń jeńimpazdary marapattaldy

Ulybrıtanııanyń British Council halyqaralyq uıymynyń uıymdastyrýymen ótken baıqaýda Qazaqstan men Ulybrıtanııanyń kolledj, mektep, ýnıversıtetter men táýelsiz jas sýretshileri 54-ten asa jumystar usynǵan. Onyń 11-i ekinshi týrǵa ótken. Osy jumystardan ádil qazylar alqasy jeńimpazdy anyqtap, eń úzdik degen alty jumysty tańdady.

Baıqaýdyń bas júldesin "Bolashaq qanaty - Qazaqstan -Ulybrıtanııa" degen jumysymen Ulybrıtanııanyń Sheffıld ýnıversıtetiniń kórkemóner fakýltetiniń 4 kýrs stýdenti Elena Pozdnıakova jeńip aldy. Jeńimpazǵa 1000 AQSh dollary kóleminde qarjylaı syılyq tabystaldy. Sonymen qatar eń úzdik degen alty jumystyń avtorlary da marapattaldy. Olar qazaqstandyq jas sýretshiler - Samal Úsentaeva, Ilıa Tenıakov, Shyryn Qurmanbekova, Aqbota Qojahmetova, Almas Mýstafaev jáne Mádına Bektaeva.

"Baıqaý Qazaqstandaǵy beıneleý ónerin damytýǵa baǵyttalǵan. Mundaı sharalar Qazaqstan men Ulybrıtanııa elderi arasyndaǵy mádenı baılanystardyń nyǵaıýyna yqpal etedi degen senimdemiz. British Council óz tarapynan jas sýretshilerge qoldaý bildirgenine qýanyshty. Negizinen bizdiń mádenı jobalar shyǵarmashylyqtaryn ulttyq ne bolmasa álemdik deńgeıde kórsete almaı júrgen jastarǵa múmkindik berýge baǵyttalǵan. Biz endi bul baıqaýdy jyl saıyn ótkizýdi josparlap otyrmyz", - dedi British Council uıymynyń sýret salasy boıynsha jobanyń menedjeri Maııa Zedelashvılı.

Onyń aıtýynsha, ádil qazylar alqasy jeńimpazdardy sýretteriniń taqyryp erekshelikterine, búgingi zamanǵa saı laıyqtalyp jasalǵandyǵyna qaraı jáne jalpy dızaınyna, sondaı-aq sýretshiniń sheberlik deńgeıine qaraı tańdaǵan.