Qazaqstanda beınebaqylaý kameralary men beınetirkeýishter sany ulǵaıtylady
ASTANA. QazAqparat - Qazaqstannyń Іshki ister mınıstrligi respýblıka boıynsha beınebaqylaý kameralary men beınetirkeýishter sany ulǵaıtýdy josparlaýda. Bul týraly búgin Úkimet otyrysynda vedomstvo basshysy Qalmuxanbet Qasymov málim etti, dep xabarlaıdy QazAqparat.
Onyń sózine qaraǵanda, jol-patrýldik polıtsııa qyzmetkerlerin beınetirkeýishtermen qamtý kózdelgen. Qurylǵylar bıylǵy jyldyń aqpan aıynda satyp alyna bastamaq.
«Ala taıaqtan» bas tartýǵa baılanysty jergilikti jerlerdegi jol-patrýldik polıtsııa qyzmetkerleri tolyǵymen jaryqshammen jabdyqtalǵan qolǵaptarmen, jaryq shaǵylystyratyn arnaıy formamen qamtamasyz etiledi.
Sonymen qatar, ІІM jergilikti ákimdikterdiń qoldaýymen aýyldyq ınspektorlardyń kólikterin daýys zoraıtqysh qurylǵylarmen jabdyqtaýdy qolǵa almaq. Joldaǵy qaýipsizdikke baqylaý negizinen patrýldik kólikpen júrgiziletindikten, aımaqtarda avtopatrýl polıtseıleriniń sanyn ulǵaıtý josparlanyp otyr.
Mınıstrdiń pikirinshe, jergilikti jerlerde joldaǵy qaýipsizdik pen tártipti foto jáne vıdeotirkeý qurylǵylary arqyly qadaǵalaý óz jemisin beredi.
«Olardyń tıimdiligi taıǵa tańba basqandaı anyq. Ótken jyldyń ózinde atalmysh qurylǵylar arqyly 900 myńǵa jýyq quqyqbuzýshylyq tirkeldi», - dedi Q. Qasymov.
Beınebaqylaý kameralaryn ornatý kezeń-kezeńmen júredi. Aldymen xalyq kóp júretin jerlerde: bazarlarda, saýda oryndarynda ornatylady.
