Qazaqstanda beınebaqylaý kameralary birtindep polıtsııa qyzmetkerlerin almastyratyn bolady
ASTANA. QazAqparat - Qazaqstanda beınebaqylaý kameralary birtindep jol boıyndaǵy polıtsııa qyzmetkerlerin almastyratyn bolady. Bul týraly búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine jergilikti polıtsııa qyzmetiniń jumysy máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
Qujatty talqylaý barysynda senator Murat Baqtııaruly jol polıtsııasy men patrýldik polıtsııany biriktirý arqyly ámbebap polıtsııa qalyptasqanyn, alaıda osynyń saldarynan polıtsııanyń birazy jol boıyna kóbirek shyǵatynyn aıtyp, polıtsııa qyzmetkerlerin beınebaqylaý kameralarymen «almastyrý» qajettigin de alǵa tartty. «Byltyr BUU zertteý júrgizdi. Ol boıynsha kóptegen elderde 100 myń adamǵa 100 polıtsııa qyzmetkerinen keledi eken. Al bizde bul 600-ge jýyqtaıdy. Byltyr eki qyzmetti biriktirip, endi kóptegen polıtsııa qyzmetkerleri jolda turatyn boldy», - deıdi depýtat.
Óz kezeginde Іshki ister mınıstri Qalmuhanbet Qasymov másele keshendi túrde sheshimin taýyp jatqanyn alǵa tartady. «Belgili bir adamdar sanyna shaqqanda polıtsııa qyzmetkerleriniń araqatynas sany neshe bolýy tıistigin belgileý - bul ońaı másele emes. Máselen, AQSh sherıfteriniń sany kóp bolǵanymen, olar polıtsııa qyzmetkeri retinde sanalmaıdy. Ekinshiden bundaı zertteýde eshkim de Qazaqstannyń aýmaǵy úlken ekenin esepke alyp jatqan joq. Aıtalyq bizde bir aýyl men ekinshi aýyldyń arasyndaǵy shaqyrymdy esepke alyp, sol úshin adam sanyna qaraı polıtsııa taǵaıyndaıtyn bolsaq, onda baıqus ýchaskelik polıtsııa qyzmetkeri bir aıdyń ishinde de óz aýmaǵyn anyqtap aralap shyǵa almaıtyn edi. Sondyqtan da, biz jergilikti polıtsııa qyzmetkerleriniń sanyn arttyrý, arttyrmaý máselesin sol jerdiń ákimderine qaldyramyz. Olar osy máseleni bizdiń aldymyzǵa qoıyp ta júr», - dedi ІІM.
Sonymen birge, vedomstvo basshysy aldaǵy ýaqytta múmkindiginshe polıtsııa qyzmetkerleriniń ornyn birtindep beınebaqylaý kameralary basatynyn jetkizdi. «Árıne, bárin sanǵa tirep eshteńe sheshe almasymyz anyq. Sondyqtan da, qazirgi kúni qaı jerde qyzmetkerdi tehnıkamen aýystyrýǵa múmkindik bolsa, ol oryndalyp jatyr. Alaıda tehnıkalar bolmaǵan oryndarda polıtsııalar júrýge májbúr. Degenmen, bul másele keshendi túrde sheshimin tabady», - dedi mınıstr.
