Qazaqstanda bes jyldan keıin 20 jyldan astam ýaqyt paıdalanylǵan kólikter úlesi 70 paıyzdy quraıdy

ASTANA. QazAqparat - Qazaqstanda 5 jyldan keıin 20 jyldan astam ýaqyt paıdalanylǵan kólikter úlesi 70 paıyzdy quraıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Investıtsııalar jáne damý vıtse-mınıstri Albert Raý málim etti.

«Búgingi kúni Qazaqstanda 4 mln. jeńil kólik bolsa, olardyń teń jartysynyń ortasha paıdalanylǵan merzimi 19 jyldy quraıdy. Endi 5 jyldan keıin 20 jyldan astam ýaqyt paıdalanylǵan kólikter úlesi 70 paıyzǵa jetedi», - dedi A.Raý.

Vıtse-mınıstrdiń atap ótýinshe, bul kórsetkish Germanııada shamamen 8 jyldy quraıdy. Jalpy, eski kólikterdiń joldaǵy qaýipsizdiginen bólek qorshaǵan ortaǵa tıgizer zııany da kóp.

«Sondyqtan da, jasyratyny joq, Qyrǵyzstan Keden odaǵyna kirer kezde biz kórshi elden eski-qusqy kóliktiń aǵylýyna jol bermeıtindigimizdi aıtqan bolatynbyz. Qazirgi ýaqytta biz naqty sharalar engizdik. Elge kirgiziletin kólikter aǵymdaǵy jyly iske qosylǵan Keden odaǵynyń tehnıkalyq reglamentterine saı bolýy tıis. Eski kólikterdiń aǵylýyna tosqaýyl bolatyn ekinshi shara, bul tirkeý alymynyń artýy bolmaq», - dedi ol.

Aıta keteıik, aldaǵy ýaqytta 1 jyldan 3 jylǵa deıingi ýaqyt júrilgen kólikterdi tirkeý alymy 50 eseptik kórsetkishti, al júrilgen merzimi 3 jyldan asqan avtomobılderdiń alymy 500 eseptik kórsetkishti quraıtyn bolady. Mundaı ózgeristi kózdeıtin zań jobasy Májilis maquldaýynan ótip, búginde Senat qaraýynda jatyr.