Qazaqstanda bes jyl ishinde tabysy kúnkóris deńgeıinen tómen halyqtyń úlesi 2,3 esege azaıdy - UEM
ASTANA. QazAqparat - Úı sharýashylyqtaryn zertteý derekteri boıynsha Qazaqstanda tabysy kúnkóristiń eń tómengi deńgeıiniń shamasynan tómen halyqtyń úlesi 2014 jyly 2,8 paıyzdy qurady.
Osylaısha, sońǵy bes jyldyń ishinde atalǵan sanattaǵylardyń úlesi 2,3 esege qysqaryp otyr. Bul týraly QR Ulttyq ekonomıka mınıstrliginiń baspasóz qyzmetinen habarlandy.
«Sonymen qatar, qalalyq jáne aýyldyq jerdegi tabystardyń aıtarlyqtaı saralanýy saqtalýda. Máselen, qalalyq jerde tabysy kúnkóristiń eń tómengi deńgeıiniń shamasynan tómen halyqtyń úlesi 1,3 paıyzdy qurady, al aýyldyq jerde 4,7 paıyz boldy. Aýyldyq jerdegi kedeıliktiń deńgeıi qalalyq deńgeıden 3,6 esege joǵarylady», - delingen baspasóz baıanynda.
Kedeıliktiń óńirlik bólinisin qarastyrǵanda, 2014 jyly kedeıliktiń joǵary úlesi Ońtústik Qazaqstan (6,1%), Soltústik Qazaqstan (4,2%), Qyzylorda oblystarynda (3,2%), eń az úlesi - Astana (0,4%) jáne Almaty (0,6%) qalalarynda tirkelgen.
Al aýyldyq jerler boıynsha kedeıliktiń joǵary úlesi Ońtústik Qazaqstan (8,1%), Soltústik Qazaqstan (6,0%) jáne Qaraǵandy oblystarynda (5,7%) baıqaldy.
