Qazaqstanda bes jyldyń ishinde ana ólimi 35% tómendedi – mınıstrlik
ASTANA.KAZINFORM - Sońǵy bes jyldyń ishinde Qazaqstanda ana ólimi 35% azaıdy. Bul týraly QR Densaýlyq saqtaý mınıstri Aqmaral Álnazarova Astanada ótken Ortalyq Azııadaǵy áıelder men jastar densaýlyǵyna klımattyq jáne ekologııalyq qaýipterdiń áserine arnalǵan halyqaralyq sessııada málimdedi.
Qazaqstanda sońǵy bes jyldyń ishinde ana ólimin 35% tómendetýge, sondaı-aq ana men bala densaýlyǵynyń negizgi kórsetkishterin jaqsartýǵa qol jetkizildi. Sonymen qatar náreste jáne perınataldyq ólim kórsetkishteri de tómendedi.
Densaýlyq saqtaý mınıstrliginiń málimetinshe, bul júıeli reformalar men medıtsınalyq kómektiń zamanaýı standarttaryn engizýdiń nátıjesi. Densaýlyq saqtaý mınıstri Aqmaral Álnazarovanyń aıtýynsha, klımattyń ózgerýi halyq densaýlyǵyna áser etetin mańyzdy faktorlardyń birine aınalyp otyr.
– Klımattyq qaýipter adamdardyń densaýlyǵyna, demografııalyq úderisterge jáne densaýlyq saqtaý júıesiniń turaqtylyǵyna áser etetin júıeli faktorǵa aınalyp otyr, – dep atap ótti mınıstr.
Onyń aıtýynsha, temperatýranyń kóterilýi men ekologııalyq faktorlar ınfektsııalyq jáne júrek-qantamyr aýrýlarynyń qaýpin arttyryp, áıelderdiń reprodýktıvtik densaýlyǵyna keri áser etýi múmkin. Elimizde júkti áıelderdi erte baqylaýǵa alý, áıelder densaýlyǵyn nyǵaıtýǵa baǵyttalǵan «Analar saýlyǵy» baǵdarlamasy iske asyrylyp jatyr. Sondaı-aq medıtsınalyq-sanıtarııalyq alǵashqy kómek deńgeıinde jáne oblystyq perınataldyq ortalyqtarda áıelder konsýltatsııalarynyń qyzmeti qaıta jandandy.
Júkti áıelderdiń 90%-dan astamy 12 aptaǵa deıin esepke alynady. Týa bitken damý kemistikteri men hromosomalyq patologııalary bar bala týý qaýpin ýaqytyly baǵalaý úshin «Bir kúndik klınıka» jobasy júzege asyrylyp jatyr.
Bul joba qajetti tekserýler men konsýltatsııalardan qysqa merzimde keshendi túrde ótýge múmkindik berip, áıelder úshin medıtsınalyq kómektiń qoljetimdiligi men ýaqytyly kórsetilýin arttyrady. Sondaı-aq jasóspirimderdiń reprodýktıvtik jáne psıhıkalyq densaýlyǵy máseleleri boıynsha aldyn alý jumystary men konsýltatsııalar berý júrgiziletin jastar densaýlyq ortalyqtary jumys isteıdi.
Aıta keteıik, Qazaqstan ana ólimin aıtarlyqtaı tez tómendetken on eldiń qataryna kirdi.
