Qazaqstanda bes oblys egin jınaý naýqanyn bastady

ASTANA. QazAqparat - Qazaqstannyń ońtústiginde bes oblys egin jınaý naýqanyn bastap ketti. Al osy egin egý men ony orý naýqanyn qarjylandyrý úshin «QazAgro» holdıngine 60 mlrd teńge kóleminde bıýdjettik nesıe berilgen. Bul aqsha sharýalar tarapynan neshe esemen qaıtatynyn osy jyldyń jeltoqsanynda jarııa etemiz dedi holdıng basshylyǵy.

«Bıyl aýyl sharýashylyǵyndaǵy basty agrarlyq sharalardy  egin egý men jınaý jumystaryn qarjylandyrý úshin «QazAgro» holdıngine 60 mlrd.teńge somasyna bıýdjettik nesıe berildi», - dep málim etti «QazAgro» Ulttyq basqarýshy holdıngi» AQ-nyń basqarma tóraǵasy Nurlybek Malelov.

Bul qarajatty qaryz túrinde Holdıng pen ekinshi deńgeıli bankter birneshe baǵyt boıynsha ózara bólip alǵan. Ár tarap ózine berilgen qarjyny birneshe baǵyt boıynsha odan ári júzege asyrǵan.

«Qarajat qaryz túrinde Holdıng pen ekinshi deńgeıli bankter arasynda myna baǵyttar boıynsha bólindi:

   - aýylsharýashylyq taýar óndirýshilerin tikeleı nesıeleý jáne shaǵyn qarjy uıymdary men aımaqtyq aqparattyq ortalyqtar arqyly nesıeleýge 36 mlrd. teńge;

- áleýmettik kásipkerlik korporatsııalardyń kepildigimen astyqty forvardtyq satyp alý úshin 15,4 mlrd. teńge;

- ekinshi deńgeıli bankter arqyly aımaqtaǵy astyq kooperatıvterin qarjylandyrýǵa 8,6 mlrd. teńge bólingen»,-dep atap ótti ol.

N.Malenovtiń aqparatyna súıensek, 20 shildedegi jaǵdaı boıynsha 60 mlrd teńgeniń 58,4 mlrd. teńgesi  2514 aýylsharýashylyq taýar óndirýshilerine jetken. Qarjy aıasynda ıgerilip jatqan jer kólemi  5 mln gektar.