Qazaqstanda berilgen dıplomdar Azııa-Tynyq muhıty elderinde tanylatyn boldy
ASTANA. KAZINFORM — Májilis depýtattary Joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasyn ratıfıkatsııalady. Tokıo konventsııasy retinde belgili bul qujat akademııalyq jáne kásibı utqyrlyqty keńeıtýge, dıplomdardy, dárejelerdi jáne ózge de biliktilikterdi tanýdy jeńildetýge baǵyttalǵan.
2011 jyly Tokıo qalasynda qabyldanǵan bul konventsııa Azııa-Tynyq muhıty aımaǵyndaǵy memleketter arasynda joǵary bilim salasyndaǵy biliktilikti tanýǵa ortaq qaǵıdattardy ustaný baǵytynda yntymaqtastyq ornatady.
— Qazaqstan úshin bul qadam halyqaralyq bilim keńistigine yqpaldasý saıasatynyń qısyndy jalǵasy bolyp sanalady. 1998 jyly elimiz Lıssabon konventsııasyna qosylǵannan keıin sheteldik bilim qujattaryn tanýdyń tıimdi júıesin qalyptastyryp, eýropalyq eldermen ózara tanýdy qamtamasyz etti. Al Tokıo konventsııasyn ratıfıkatsııalaý Qazaqstanǵa Azııa-Tynyq muhıty óńiriniń ulttyq aqparattyq ortalyqtar jelisiniń (APNNIC) múshesi bolýǵa múmkindik beredi. Bul jeli qatysýshy elderdiń biliktilikterdi tanýdaǵy aqparat almasýyn qamtamasyz etip, stýdentter men oqytýshylardyń akademııalyq utqyrlyǵyn arttyrady, — dedi QR Ǵylym jáne joǵary bilim mınıstri Saıasat Nurbek Májilistiń jalpy otyrysynda.
Konventsııaǵa qatysýshy memleketter qatarynda Aýstralııa, Japonııa, Qytaı, Koreıa, Túrkııa jáne basqa elder bar. Qazaqstan Ortalyq Azııa elderi arasynda birinshi bolyp Konventsııany ratıfıkatsııalaý jumysyn bastady.
Konventsııany ratıfıkatsııalaý Qazaqstanǵa mynadaı múmkindikterdi ashady:
• Otandyq joǵary oqý oryndarynyń bilim qyzmetterin eksporttaý naryǵyn keńeıtedi.
• Ulttyq joǵary bilim júıesine halyqaralyq senimin nyǵaıtady.
• Qazaqstanda alynǵan dıplomdardy Azııa-Tynyq muhıty óńirinde tanýǵa qoıylǵan kedergiler joıylady.
• Zamanaýı bilim berý tájirıbeleri men tehnologııalaryn almasýǵa jaǵdaı jasaldy.
— Bizdiń maqsatymyz — Qazaqstanda berilgen dıplomdardy búkil álemde taný qaǵıdattaryna kepildik berý. ıÝNESKO tarapynan Jahandyq dıplomdardy taný konventsııasy bar. Oǵan Qazaqstan áli qosylǵan joq. Búgingi ratıfıkatsııa búkil álemde dıplomdarymyzdyń tanylýyna jasalǵan úlken qadam retinde qabyldańyzdar, — dedi S. Nurbek.
Buǵan deıin ekonomıst Saparbaı Jubaev Ózbekstan jastary úshin dıplomdy rastaý (nostrıfıkatsııa) talabyn alyp tastaý keregin aıtqan edi.
Aıta keteıik, Qazaqstan stýdentteri Estonııa ýnıversıtetterinen taǵylymdamadan ótedi.