Qazaqstanda benzınniń qymbattaýyna eshqandaı negiz joq - E. Dosaev
«Búgingi jaǵdaıda boljam jasaý - jaqsy yrym emes. Degenmen, kesip aıtatyn másele, eger tipti tehaktsızder engizýge qatysty baǵa kóterilse de, oǵan qatysty túsetin aýyrtpalyqty qarastyrý kerek. Keshe bizge osyǵan qatysty suraqtar qoıyldy ǵoı, máselen, qazirgi tonnasyna 4,5 myń teńgeden 10,5 myń teńgege deıin kóterý týraly bolsa, onda osy 6 myń teńgeni lıtrge bólip, onyń oryn alýy múmkin aýyrtpalyǵyn esepteýimiz kerek», - dedi Erbolat Dosaev benzınniń baǵasyna qatysty máselege toqtala otyryp. Bul rette mınıstr sarapshylar tarapynan AI-92 markaly benzıniniń lıtri 3 teńgege kóterilýi múmkin ekendigi týraly aıtylǵanyn, budan basqa da boljamdar týraly sóz bolyp jatqanyn atap ótti. Sonymen qatar, onyń aıtýyna qaraǵanda, dál qazirgi kúni benzınge baǵanyń kóterilýine qatysty eshqandaı da alǵyshart joq. Óıtkeni, benzınge tapshylyq ta joq, tek satýshylar arasynda báseke ǵana bar.
«Baǵa aıyrmasy saldarynan qazaqstandyq benzınniń Reseıge aǵylýy da oryn alǵan emes. Munda tek baǵa mámileleri týraly máseleler ǵana bar, alaıda onymen Básekelestikti qorǵaý jáne tabıǵı monopolııalardy retteý komıteti aınalysady. Qazir óńirlerdegi baqylaýda turǵan 74 zertteý nysanynyń basym bóligi janar-jaǵarmaı naryǵy men azyq-túlikke qatysty bolyp tabylady. Bul máseleler udaıy baqylaýda bolady», - dedi E. Dosaev.
