Qazaqstanda benzın men dızel bırja arqyly saýdalanady

NUR-SULTAN. QazAqparat - 2021 jyldyń 1 qańtarynan bastap elimizde óndirilgen benzın men dızel otynyń 10 paıyzy bırja arqyly saýdalanatyn bolady. Bul týraly búgin Energetıka mınıstrliginiń alqa otyrysynda vedomstvo basshysy Nurlan Noǵaev aıtty, dep habarlaıdy QazAqparat tilshisi.

«Naryqtaǵy qarym-qatynastardy, onyń ishinde munaı ónimderiniń ashyq saýdada bolýyn qamtamasyz etý baǵytynda munaı ónimderin, atap aıtqanda, 2020 jyldyń 1 shildesine deıin mazýt pen avıakerosındi bırjaǵa shyǵaryp, saýdalaý tásilderin uıymdastyrý jumysy júrgizilip jatyr. Kelesi jyldyń 1 qańtarynda osy ádispen naryqqa shyqqan benzın men dızel otynynyń 10 paıyzy bırjada saýdalanady. Biz osylaısha bul ádisti synaqtan ótkizemiz», - dedi mınıstr.

Eske salsaq, ol 2019 jyly 180 myń tonna benzın eksportqa shyǵarylǵanyn aıtty.

«Degenmen shekaralas Reseı, Qyrǵyzstan, Ózbekstanǵa kontrabandamen 400 myń tonnaǵa jýyq benzın men basqa da janar-jaǵarmaı túrleri shyǵarylǵan», - degen Nurlan Noǵaev buǵan aldaǵy ýaqytta jol bermeý úshin benzındi avtomobılmen el aýmaǵynan shyǵarýǵa tyıym ýaqyty uzartylatyndyǵyn eskertti.