Qazaqstanda benzın baǵasyn kóterýge moratorıı engiziledi
ASTANA. KAZINFORM — Energetıka vıtse-mınıstri Suńǵat Esimhanov AI-92 markaly benzın men dızel otyny baǵasyn odan ári kóterýge moratorıı engiziletinine qatysty pikir bildirdi. Bul týraly Úkimettiń baspasóz qyzmeti málim etti.
— Memleket basshysynyń áleýmettik jaǵdaıdy turaqtandyrý boıynsha bergen tapsyrmalaryna sáıkes barlyq jumystar júrgizilip jatyr. Eń aldymen janarmaı baǵasynyń kóterilmeý máselesin qarastyryp jatyrmyz. Búginnen bastap moratorıı jarııalanady. Energetıka mınıstrligi Básekelestikti qorǵaý jáne damytý agenttigimen jáne óńir ákimdikterimen birlesip tıisti jumystardy júrgizip jatyr. Sonymen qatar elektr energııasy, jylý salasyndaǵy tarıfterdiń de kóterilmeýin qadaǵalaımyz. Jumys birneshe baǵytta júrgiziletin bolady — bul ishki shyǵyndardy ońtaılandyrý jáne kómirdiń turaqty baǵasyn, sondaı-aq temirjol tarıfterin qamtamasyz etý. Jaqyn arada kommýnaldyq qyzmetter tarıfterin kóterýge moratorıı jarııalanady. Bunyń barlyǵy Prezıdenttiń bergen tapsyrmasyna sáıkes júzege asady, — dedi energetıka vıtse-mınıstri.
Eske sala keteıik, búgin Premer-mınıstr Úkimet músheleriniń, basqa da memlekettik organdar men uıymdar basshylarynyń qatysýymen Memleket basshysynyń azamattar múddesi úshin ekonomıkalyq reformalar baǵdarlamasyn júzege asyrýdy retke keltirý jónindegi tapsyrmalaryn oryndaý máseleleri boıynsha ótkizgen keńeste bıylǵy 16 qazannan bastap ınflıatsııa deńgeıi turaqtanǵanǵa deıin AI-92 markaly benzın men dızel otyny baǵasyn odan ári kóterýge moratorıı engiziletinin málimdedi.