Qazaqstanda benzın baǵasy qalaı ózgeredi — Energetıka mınıstrligi
ASTANA. KAZINFORM — Elimizde AI-92 janarmaıy men dızel otynyn qymbattatýǵa engizilgen moratorıı aıaqtaldy. Energetıka vıtse-mınıstri Suńǵat Esimhanov endi qandaı ózgerister bolady degen suraqqa jaýap berdi.
— Buǵan deıin de este bolsa, janar-jaǵarmaı naryǵy erkin aınalymǵa jiberilgen kezde baǵa kúrt ósken joq. Bul tek Energetıka mınıstrliginiń ǵana emes, Básekelestikti qorǵaý jáne damytý agenttigi, ákimdikter jáne basqa da memlekettik organdardyń birlesken jumysynyń nátıjesi. Biz naryqty turaqty baqylap otyrmyz, básekege qarsy áreketterge jol bermeýge tyrysamyz, — dedi Suńǵat Esimhanov Úkimet úıinde ótken baspasóz mslıhatynda.
Onyń aıtýynsha, janarmaı baǵasynda kúrt qymbattaý bolmaıdy.
— Baǵa naryq deńgeıine birtindep beıimdelýi múmkin. Kórshi elderde janarmaı baǵasy áldeqaıda joǵary ekenin ózderińiz de kórip otyrsyzdar. Sondyqtan azdap, birtindep ósýi múmkin, biraq kúrt qymbattaý bolmaıdy dep oılaımyn, — dep tolyqtyrdy vıtse-mınıstr.
Eske salaıyq, Qazaqstanda 1 sáýirden bastap AI-92 benzıni men dızel otyny baǵasynyń ósýine engizilgen moratorıı óz kúshin joıdy.
Buǵan deıin «Týrıstik Qamqor» uıymy Taıaý Shyǵystaǵy shıelenis pen Ormýz buǵazyndaǵy irkilister álem boıynsha janarmaı baǵasynyń qymbattaýyna áser etkenin aıtqan edi.
