Qazaqstanda benzın arzandaýy múmkin - Pavlodar MHÓZ basshysy

ASTANA. QazAqparat - Pavlodar munaı-hımııa óńdeý zaýytynyń bas dırektory Danbaı Shýhrat Qazaqstanda benzın baǵasy arzandaýy múmkin be degen suraqqa jaýap berdi, dep habarlaıdy «QazAqparat» HAA tilshisi.

«Jeltoqsan, qańtar men aqpan aılary ózderińiz biletindeı, benzındi asa qajet etpeıtin kezeń. Eger munaı óńdeý zaýyttary tolyq qýatta jumys isteıtin bolsa, benzın baǵasy arzandaýy múmkin», - deıdi Energetıka mınıstrliginde tilshilerge suhbat bergen zaýyt basshysy Danbaı Shýhrat.

Onyń aıtýynsha, Pavlodar munaı-hımııa óńdeý zaýytynda jańǵyrtý jumysy shegine jetken. Zaýyt joǵary sapaly benzınniń alǵashqy partııasyn osy jyldyń 10 qarashasynda shyǵarmaq. Onyń keltirgen málimetine sensek, barlyq jańa qurylǵylar tolyq qýatta jumys bastaǵannan keıin atalǵan zaýytqa 5,1 mıllıon tonna munaı jetkizilse, óndiriletin ashyq munaı ónimderiniń mólsheri 3,2 mıllıon tonnaǵa jetetin bolady.

«Benzın pavlodarlyq zaýyttan Óskemen, Semeı, Qaraǵandy, Petropavl qalalaryna tasymaldanatyn bolady. Qajettilik týyndaǵan jaǵdaıda Almaty oblysyna da jiberiledi», - deıdi ol.