Qazaqstanda belsendi shaǵyn kompanııalar sany 2 paıyzǵa artty

Degenmen bul elimizdegi jumys istep turǵan shaǵyn bıznestiń jartysy ǵana. Tipti, keıbir salalarǵa shaǵyn bıznes belsendiligi kúrt qysqarǵany da baıqalady, dep habarlaıdy QazAqparat tilshisi Finprom.kz-ke silteme jasap.

Elimizde tirkelgen shaǵyn kompanııalardyń sany 9 jyl qatarynan artyp kele jatyr. 2020 jyldyń qarashasynda elimizde mundaı 452,4 myń kompanııa bolǵan. Bul bir jyl burynǵy kezeńdegi kórsetkishten 3,6 paıyzǵa kóp. Jyl ishinde barlyq tirkelgen zańdy tulǵalardyń sanyndaǵy shaǵyn kompanııalardyń úlesi 98-den 98,1 paıyzǵa ǵana artty. Sonymen qatar bir jyl ishinde tirkelgen jumys istep turǵan shaǵyn kompanııalardyń úlesi 67,4 paıyzdan 69,9 paıyzǵa deıin ulǵaıdy. Bul 316,3 myń kásiporyndy quraıdy jáne bir jyl burynǵy kórsetkishten 7,6 paıyzǵa kóp.

Buǵan qosa, bir jyl ishinde jumys istep turǵan belsendi shaǵyn kompanııalardyń úlesi 54,4 paıyzdan 51,4 paıyzǵa deıin qysqardy. Degenmen jyl ishinde olardyń sany 1,7 paıyzǵa kóbeıip, 2020 jyldyń qazan aıynyń sońynda 162,4 myń belsendi kásiporyndy qurady.

Belsendi shaǵyn kompanııalardyń tórtten biri Almaty qalasynda tirkelgen. Qalada mundaı 4,6 myń kásiporyn bar jáne olardyń sany ótken jylmen salystyrǵanda 7,2 paıyzǵa artyp otyr. Odan keıingi oryndarda Nur-Sultan qalasy (25,4 myń), Qaraǵandy (10 myń) jáne Shyǵys Qazaqstan oblystary (9,7 myń) tur.

Belsendi shaǵyn kompanııalardyń jartysynan kóbi tek 4 salada ǵana jumys isteıdi. Eń kóbi kóterme jáne bólshek saýda, sonymen qatar avtomobıl men mototsıkl jóndeý salalarynda - 39,4 myń kompanııa. Munan keıingi oryndarǵa bilim berý (15,7 myń), qurylys (15,6) kásibı, ǵylym jáne tehnıkalyq qyzmet (12,3) salalary ornalasqan.

Jyl ishinde qarjy jáne saqtandyrý qyzmeti salalaryndaǵy belsendi shaǵyn kompanııalardyń sany birden 21,6 paıyzǵa, 3 myńǵa deıin qysqaryp otyr.