Qazaqstanda «Bekire-2026» balyq qorǵaý aktsııasy bastaldy
ASTANA. KAZINFORM – 1 sáýiri men 31 mamyry aralyǵynda Atyraý, Mańǵystaý jáne Batys Qazaqstan oblystarynda jyl saıyn keń aýqymdy «Bekire"balyq qorǵaý aktsııasy ótedi. Bul týraly AShM baspasóz qyzmeti habarlady.
Baǵaly balyq túrleriniń ýyldyryq shashý kezeńinde tabıǵat qorǵaý jáne quqyq qorǵaý organdarynyń qyzmetkerleri balyqtardyń, onyń ishinde bekire tuqymdas balyqtardyń ýyldyryq shashý oryndaryna kóshýin qamtamasyz etý maqsatynda balyqtardyń zańsyz aýlanýy men aınalymyna qarsy is-qımyl boıynsha kúsh biriktiredi.
Aktsııa aıasynda sý aıdyndarynda brakonerlik faktileri barynsha yqtımal oryndarda statsıonarlyq jáne jyljymaly beketter uıymdastyryldy, sondaı-aq batys oblystarynyń tas joldarynda mobıldi toptar quryldy.
Ásirese, Kaspıı teńiziniń jaǵalaýy men Jaıyq jáne Qıǵash ózenderiniń jaǵalaýyna basa nazar aýdarylatyn bolady, óıtkeni bul jerlerde brakonerlik faktileri jıi tirkeledi.
Sonymen qatar, aktsııa barysynda áýejaılarda, vokzaldarda jáne iri avtojoldarda trassalarda balyq pen balyq ónimderin respýblıkadan tys jerlerge áketýge baqylaý kúsheıtiletin bolady. Budan basqa, respýblıka aýmaǵynda balyqtyń zańsyz aınalym faktilerin anyqtaý, jolyn kesý jumystary qolǵa alynady.
Aktsııaǵa Atyraý, Batys Qazaqstan, Mańǵystaý oblystarynyń tabıǵat qorǵaý jáne quqyq qorǵaý organdarynyń 1143 qyzmetkerleri jumyldyryldy.
Jaıyq-Kaspıı basseıninde 226 avtokólikter men kvadratsıkl, 91 qaıyq pen shaǵyn kólemdi kemeler, 6 ushý apparaty jáne basqa da tehnıkalyq quraldar iske qosylatyn bolady. Barlyǵy 39 beket quryldy, onyń 9-y statsıonarlyq jáne 30-y jyljymaly beketter. Sonymen qatar, batys óńirdegi avtojoldar men tasjoldarda jumys isteıtin 26 mobıldi top quryldy.
Aıta ketý kerek, «Bekire-2025» aktsııasy nátıjesinde quqyq qorǵaý jáne tabıǵat qorǵaý organdary tabıǵat qorǵaý zańnamasynyń 1125 buzýshylyǵyn anyqtady, 867 zań buzýshy ákimshilik jaýapkershilikke tartylyp, 33 qylmystyq is tirkeýge alyndy.
Aıta ketelik Túrkistan oblysynda brakonerlerden 130 kelige jýyq balyq tárkilendi.
