Qazaqstanda bekire tuqymdastardy ósiretin zaýytty qalpyna keltirý josparlanýda
ASTANA. QazAqparat - Qazaqstanda Atyraý jáne Oral-Atyraý bekire tuqymdas balyq zaýyttaryn qalpyna keltirý jumystary josparlanýda. Olardyń jalpy qýatyn jylyna 7 mln-nan 12 mln. shabaqqa deıin jetkizedi. Bul týraly búgin ótken semınar-keńeste QR Qorshaǵan orta jáne sý resýrstary mınıstrligi Balyq sharýashylyǵy komıteti tóraǵasynyń orynbasary Qaıyrbek Musabaev aıtty.
Onyń málimetinshe, jobany iske asyrýǵa jalpy somasy 70 mlrd. teńge qajet. Kózdegen maqsatqa jetý úshin balyq sharýashylyǵyn 2020 jylǵa deıin damytýdyń jospary jasalǵan. Onda balyq sharýashylyǵyn damytý kózdeledi.
Semınarda Qazaqstannyń tabıǵı sý qoımalaryndaǵy balyq popýlıatsııasynyń azaıý tendentsııasyn toqtatýdyń balamaly sheshimi retinde taýarlyq balyq sharýashylyǵyn damytýdy jolǵa qoıý sóz boldy.
Jappaı balyq aýlaýdan góri taýarlyq balyq sharýashylyǵyn damytý elimizdiń tabıǵı sý qoımalaryndaǵy balaqtardyń kóbeıýine jol ashady.
Tóaraǵa orynbasarynyń aıtýynsha, taýarlyq balyq sharýashylyǵyn damytý áleýmettik-ekonomıkalyq tıimdiligin de kórsetedi. Sonymen qatar, balyq ósirýmen aınalysatyn sharýashylyqtar qurý aýyldy jerlerde jańa jumys oryndarynyń ashylýyna septigin tıgizedi.
Aıta keteıik, sharaǵa ǴAO (Birikken Ulttar Uıymynyń Azyq-túlik jáne aýyl sharýashylyǵy uıymy) Aımaqaralyq bıýrosynyń sarapshysy Haıdar Fersoı (Ankara, Túrkııa) qatysyp, balyq sharýashylyǵyn damytýdaǵy halyqaralyq standarttar týraly baıandama jasady.
Semınarda, sondaı-aq, 2020 jylǵa deıin arnalǵan balyq sharýashylyǵyn damytý baǵdarlamasynyń jobasy talqylandy. Qujat balyq sharýashylyǵynyń turaqty damýyn qamtamasyz etý, sý resýrstarynyń bıologııalyq alýan túrliligin saqtaý maqsatynda ázirlengen. Mamandardyń aıtýynsha, josparlanǵan is-sharalardyń júzege asyrýy nátıjesinde balyq ósirýdi damytý esebinen 2020 jyly balyq aýlaý kólemi 10 myń tonnaǵa jetkizilmek.
