Qazaqstanda bekire tuqymdas balyqtardy ǵylymı maqsatta aýlaýǵa tyıym salyndy

ASTANA. QazAqparat - Qazaqstanda monojipter men monotalshyqtardan jasalǵan torlardy satýǵa tyıym salynady. Bul týraly Astanadaǵy brıfıngte Orman sharýashylyǵy jáne janýarlar dúnıesi komıteti tóraǵasy orynbasarynyń mindetin atqarýshy Narıman Júnisov málim etti.

«2010 jyldan beri Qazaqstan aýmaǵynda bekire tuqymdas balyq túrlerin aýlaýǵa tyıym salynǵan. Sonymen birge bekire balyqtaryn qorǵaýdy kúsheıtý úshin QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetovtyń tapsyrmasymen bekire tuqymdastyrdy ǵylymı maqsatta aýlaýǵa da shekteý qoıyldy»,-dedi N. Júnisov.

Bul shara balyq ónimderiniń jasyryn aınalymyna qarsy baǵyttalǵan. Sebebi, arakidik «ǵylymı maqsatta aýlanýda» degen jeleýmen zańsyz balyq aýlaý derekteri kezdesýde.

Budan basqa, qazirgi tańda AShM jumys istep turǵan bekire balyq ósirý zaýyttarynyń jıyntyq qýatyn, naqtyraq aıtqanda, bekire tuqymdas balyq túrleriniń shabaqtaryn jylyna 7 mıllıonnan 12 mıllıon danaǵa deıin ulǵaıtyp, olardyń óndiristik bazasyn qaıta jańartý jolymen bekire tuqymdas balyq túrleriniń ósimin kóbeıtý máselesin pysyqtaýda.