Qazaqstanda «Bekire-2022» balyq qorǵaý aktsııasy bastaldy
Baspasóz qyzmetiniń málimetterine qaraǵanda, jyl saıyn balyqtardyń baǵaly túrleriniń ýyldyryq shashý kezeńinde tabıǵatty qorǵaý jáne quqyq qorǵaý organdarynyń qyzmetkerleri balyqtardyń, onyń ishinde bekire tuqymdas balyqtardyń ýyldyryq shashý oryndaryna qonys aýdarýyn qamtamasyz etý maqsatynda balyqtardyń zańsyz aýlanýyna jáne aınalymyna qarsy is-qımyl boıynsha kúsh-jigerin biriktiredi.
Balyq qorǵaý sharalarynyń tıimdiligin arttyrý úshin Ekologııa, geologııa jáne tabıǵı resýrstar, Іshki ister mınıstrleriniń jáne Ulttyq qaýipsizdik komıteti tóraǵasynyń «Bekire» balyq qorǵaý aktsııasyn ótkizý týraly» birlesken buıryǵyna qol qoıyldy.
Joǵaryda kórsetilgen buıryq sheńberinde balyq qorǵaý aktsııasyn ótkizý kezinde quqyq qorǵaý jáne tabıǵat qorǵaý organdarynyń ózara is-qımyly jónindegi úılestirý shtabynyń quramy, sondaı-aq aktsııa kezindegi birlesken is-qımyl jospary bekitildi. Úılestirý shtabyna basshylyq etý Qazaqstan Respýblıkasy Ekologııa, geologııa jáne tabıǵı resýrstar mınıstrliginiń Balyq sharýashylyǵy komıtetine júkteledi.
Aktsııa aıasynda brakonerlik faktileri bolýy yqtımal jerlerde statsıonarlyq jáne jyljymaly beketter, mobıldi reıdtik toptar uıymdastyryldy.
Negizgi kúshterdi Kaspıı teńiziniń jaǵalaýy men akvatorııasyna jáne Jaıyq pen Qıǵash ózenderiniń saǵalyq keńistikterine shoǵyrlandyrý usynylady, óıtkeni bul jerlerde brakonerlik faktileri jıi tirkeledi.
Budan basqa, aktsııa kezinde áýejaılarda, vokzaldarda jáne iri avtotrassalarda balyq jáne balyq ónimderin respýblıkadan tys jerlerge áketýge baqylaý kúsheıtiledi. Sondaı-aq, respýblıka aýmaǵynda balyqtyń zańsyz aınalymy faktileri anyqtalyp, joly kesiletin bolady.
Ótken jyldardaǵy balyq qorǵaý aktsııasynyń nátıjeleri Kóktemgi Naýqan kezeńinde brakonerlik toptardyń qyzmeti jandana túskenin kórsetedi.
«Bekire-2021» aktsııasy barysynda quqyq qorǵaý jáne tabıǵatty qorǵaý organdary tabıǵat qorǵaý zańnamasyn 1262 buzýshylyqty anyqtady, onyń ishinde Atyraý oblysynyń aýmaǵynda - 952, Mańǵystaý oblysynda – 137 jáne Batys Qazaqstan oblysynda-173 quqyq buzýshylyq.
862 quqyq buzýshy ákimshilik jaýapqa tartylyp, 56 qylmystyq is tirkeldi.
Aktsııa qorytyndysy boıynsha balyq qorǵaý zańnamasyn buzýshylarǵa 15,4 mln. teńge somasyna ákimshilik aıyppul salyndy, buzýshylardan 35,7 tonna balyq, onyń ishinde 4,6 tonna bekire tuqymdas balyq túrleri, 118 birlik júzý jáne kólik quraldary, sondaı – aq 3943 birlik aýlaý quraldary tárkilendi.
