Qazaqstanda «Bekire – 2020» balyq qorǵaý aktsııasy bastaldy

NUR-SULTAN. QazAqparat - QR Ekologııa, geologııa jáne tabıǵı resýrstar mınıstrligi Atyraý, Mańǵystaý jáne Batys Qazaqstan oblystarynda «Bekire-2020» balyq qorǵaý aktsııasyn bastady, dep habarlaıdy QazAqparat Orman sharýashylyǵy jáne janýarlar dúnıesi komıtetine silteme jasap.

Jyl saıyn baǵaly balyq túrleriniń ýyldyryq shashý kezeńinde quqyq jáne tabıǵat qorǵaý organdarynyń qyzmetkerleri balyqtardyń erkin qozǵalýyn qamtamasyz etip, sonyń ishinde bekire tuqymdas túrleriniń ýyldyryq shashý oryndaryna kedergisiz jetýi úshin birlesip jumys atqarady.

«Balyq qorǵaý sharalarynyń tıimdiligin arttyrý maqsatynda Ekologııa, geologııa jáne tabıǵı resýrstar, Іshki ister mınıstrleri men Ulttyq Qaýipsizdik Komıteti tóraǵasy arasynda «Bekire» balyq qorǵaý aktsııasyn ótkizý» týraly birlesken buıryqqa qol qoıyldy. Osy buıryqpen balyq qorǵaý aktsııasyn ótkizýde quqyq qorǵaý jáne tabıǵatty qorǵaý organdarynyń ózara árekettesý boıynsha Úılestirý shtabynyń quramy men birlesken is-qımyl jospary bekitildi. Úılestirý shtabyn basqarý Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetine júkteledi», - delingen resmı habarlamada.

Aktsııa sheńberinde brakonerlik faktileri jıi kezdesetin oryndarda statsıonarlyq, jyljymaly beketter jáne qozǵalmaly reıdtik toptar quryldy. Negizgi kúshterdi brakonerlik jıi tirkeletin Atyraý oblysy shegindegi Kaspıı teńiziniń jaǵalaýy men akvatorııasynda jáne Jaıyq pen Qıǵash ózenderiniń saǵasyna jumyldyrý kózdelgen. Budan bólek, kedendik baqylaý beketterinde, áýejaılarda, vokzaldar men iri tasjoldarda balyq ónimderin el aýmaǵynan shyǵarýdy baqylaý kúsheıedi.

«Bekire-2019» balyq qorǵaý aktsııasy nátıjesinde quqyq qorǵaý jáne tabıǵat qorǵaý organdary 1242 zańbuzýshylyqty anyqtaldy, onyń ishinde Atyraý oblysy aýmaǵynda - 916, Mańǵystaý oblysynda - 183, Batys Qazaqstan oblysynda – 143 oqıǵa tirkelgen. 913 adam ákimshilik jaýapkershilikke tartylyp, 62 qylmystyq is tirkeldi jáne 78 zańbuzýshy jaýapqa tartyldy.

Aktsııa nátıjesinde balyq qorǵaý zańnamasyn buzǵandarǵa 16,1 mln teńge ákimshilik aıyppul salynyp, 15,6 tonna balyq, onyń ishinde 3 tonna bekire tuqymdas balyq, 5,4 kg bekire tuqymdas balyqtyń ýyldyryǵy, 4132 dana aýlaý quraly men 130 dana júzý jáne kólik quraldary tárkilengen.