Qazaqstanda «Bekire-2015» balyq qorǵaý aktsııasy bastaldy
Jyl saıyn baǵaly balyq túrleri ýyldyryq shashý maýsymynda quqyq jáne tabıǵat qorǵaý organdary zańsyz balyq aýlaýǵa, ótkizýge, satyp alýǵa jáne olardy zańsyz tasmaldaýǵa jol bermeý úshin birlesip jumys atqarady. Osyǵan baılanysty balyqtardyń, sonyń ishinde bekire tuqymdas túrleriniń ýyldyryq shashý oryndaryna kedergisiz jetýine qolaıly jaǵdaı týǵyzady.
«Bekire-2015» balyq qorǵaý sharalarynyń tıimdiligin arttyrý úshin QR AShM, QR ІІM, QR UQK jáne múddeli ortalyq memlekettik organdardyń qoldaýymen ótkiziledi. Qazirgi tańda «Bekire» balyq qorǵaý aktsııasyn ótkizý týraly Aýyl sharýashylyǵy, Іshki ister mınıstrlikteriniń jáne Ulttyq Qaýipsizdik Komıteti tóraǵasynyń birlesken buıryǵy bekitilýde. Osy buıryqpen balyq qorǵaý aktsııasyn ótkizý barysynda quqyq qorǵaý jáne tabıǵatty qorǵaý organdarynyń ózara árekettesýi boıynsha Úılestirý shtabynyń quramy, sondaı-aq birlesken is-qımyl Jospary bekitiledi. Úılestirý shtabyn basqarý Aýyl sharýashylyǵy mınıstrliginiń Orman sharýashylyǵy jáne janýarlar dúnıesi komıtetine júkteledi.
Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy balyq qorǵaý aktsııasyn uıymdastyrý, ótkizý jáne úılestirý jónindegi jumys organy bolyp belgilenedi. Atyraý aýmaqtyq ınspektsııasynyń ınspektorlyq quramyn kúsheıtý maqsatynda respýblıkanyń basqa aýmaqtyq ınspektsııalarynan balyq qorǵaý memlekettik ınspektorlary tartylatyn bolady.
Aktsııa sheńberinde brakonerlik faktileriniń basym aıqyndalatyn jerlerinde statsıonarlyq, jyljymaly beketter jáne jyljymaly reıdtik toptar qurylady. Negizgi kúshterdi Atyraý oblysynyń shegindegi Kaspıı teńiziniń jaǵalaýy men alabynda jáne Jaıyq pen Qıǵash ózenderiniń saǵa aldy keńistiginde jumyldyrý kózdelgen, sebebi osy jerlerde jıirek brakonerlik faktiler tirkeledi. Sonymen qatar, jyljymaly reıdtik toptar «Aqjaıyq» memlekettik tabıǵı rezervattyń aýmaǵyn baqylaý úshin qurylatyn bolady.
Budan basqa, kedendik baqylaý beketterinde, áýejaılarda, vokzaldarda jáne iri tas joldarda Qazaqstan Respýblıkasynan tysqary balyq ónimderin shyǵarýǵa baqylaý jumystaryn kúsheıtý kózdelgen. Budan basqa Astana, Almaty, Atyraý, Aqtaý, Aqtóbe, Oral qalalarynda balyq ónimderin zańsyz satý oryndaryna monıtorıng jáne ol týraly aqparat jınaqtalatyn bolady.