Qazaqstanda bazarlarǵa arnalǵan biryńǵaı dızaın-kod engizilýi múmkin
ASTANA. KAZINFORM — Danııar Qasqaraýov Arman Shaqqalıev-qa depýtattyq saýal joldap, Almaty oblysy aýdan ortalyqtaryndaǵy bazarlardyń jaǵdaıyn kóterdi.
Májilis depýtaty bazarlardyń qazirgi jaǵdaıyn qatań synǵa alyp, ınfraqurylym men sanıtarlyq talaptardyń júıeli túrde saqtalmaı otyrǵanyn aıtty.
Onyń sózinshe, XXI ǵasyr talaptaryna saı kelmeıtin tártipsizdik baıqalady: saýda qatarlary men ınfraqurylym eskirgen, sanıtarlyq-gıgıenalyq normalar óreskel buzylǵan, bazar ishinde qoqys jınalyp, sý aǵatyn júıeler bitelgen.
Sonymen qatar, turaq oryndarynyń joqtyǵy kólik keptelisterin týǵyzyp, turǵyndarǵa qolaısyzdyq týdyryp otyrǵany aıtyldy.
Depýtattyń pikirinshe, qazirgi bazarlar aýdannyń ımıdjine keri áser etedi.
Ol kásipkerlerdiń qolaısyz jaǵdaıda jumys istep jatqanyn, al bazar ıeleriniń ınfraqurylymdy jańartýǵa jetkilikti ınvestıtsııa salmaı otyrǵanyn da atap ótti.
Danııar Qasqaraýov sondaı-aq mundaı máseleler Almaty oblysy-nyń basqa aýdandarynda da bar ekenin aıtty.
Osyǵan baılanysty ol:
- bazarlar qyzmetine keshendi tekseris júrgizýdi
- sanıtarlyq, órt qaýipsizdigi jáne qala qurylysy normalaryn baǵalaýdy
- keıbir bazarlardy jańǵyrtý nemese eldi mekender shetinen kóshirýdi
- sondaı-aq bazarlar men saýda nysandaryna biryńǵaı arhıtektýralyq jáne dızaın-kod engizýdi usyndy
Depýtat bul bastama bıznesti shekteýge emes, kerisinshe qaýipsiz ári zamanaýı saýda jaǵdaıyn jasaýǵa jáne halyqtyń ómir sapasyn arttyrýǵa baǵyttalǵanyn atap ótti.
Aıta keteıik, 2026 jyly jeke ınvestıtsııalar esebinen jalpy aýmaǵy shamamen 16 myń sharshy metr bolatyn kópfýnktsıonaldy fermerlik bazar ashý josparlanǵan.
Aıta keteıik, Saýda jáne ıntegratsııa mınıstrligi Premer-mınıstrdiń tapsyrmasyn oryndaý aıasynda eldegi bazarlarda ónimsiz deldaldardy qysqartý jumysyn jandandyrdy.
