Qazaqstanda bazalyq mólsherlemeniń tómendeýin qashan kútýge bolady — qarjyger pikiri

ALMATY. KAZINFORM — Qazaqstan qarjygerleri qaýymdastyǵynyń tóraıymy Elena Bahmýtova eldegi bazalyq mólsherleme týraly pikir bildirdi.

Kazinform tilshisine bergen jaýabynda Elena Bahmýtova aldaǵy 6–9 aıda bazalyq mólsherlemeniń tómendeýi ekitalaı ekenin aıtty.

— Menińshe, kem degende aldaǵy 6–9 aıda bazalyq mólsherlemeniń tómendeýi kútilmeıdi. Jańa Salyq kodeksiniń engizilýine baılanysty qysqa merzimdi bolsa da, ınflıatsııanyń ósýi kútiledi. Aldyn ala esep boıynsha 2–2,5%. Mundaı jaǵdaıda Ulttyq bank bazalyq mólsherlemeni tómendetse, qısynsyz bolar edi. Salyq kodeksiniń áseri álsiregennen keıin ózgeristi kútýge bolady. Biraq bul 2026 jyldyń sońyna qaraı bolýy múmkin, — dedi ol.

Eske salaıyq, 2025 jyldyń qazan aıynda Qazaqstan Respýblıkasy Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.

Almatyda ótken Qazaqstan qarjygerleriniń XIII kongresinde Ulttyq Bank tóraǵasy Tımýr Súleımenov josparlanǵan salyq jáne bıýdjet reformalary ınflıatsııaǵa qalaı áser etetinin aıtty.